ଭୁବନେଶ୍ବର: ହୁସିଆର ଠକେଇର ନୂଆ ଚାଲ। ସାଇବର ଠକେଇର ନୂଆ ଟ୍ରେଣ୍ଡ । କଷ୍ଟମର ସର୍ଭିସ ଦେବା ଆଳରେ ସାଇବର କ୍ରାଇମ। ହେଲପ ବାହାନାରେ ଟଙ୍କା ହାଇଜାକ ପାଇଁ ଟ୍ରିକ। ଏଥିପାଇଁ ଅନଲାଇନରେ ପୁଳା ପୁଳା ହେଲପଲାଇନ ନମ୍ବର। ଯେଉ ସବୁ ସମସ୍ୟା ପାଇଁ ଆପଣ ଅନଲାଇନରେ ହେଲପଲାଇନ ନମ୍ବର ସର୍ଚ୍ଚ କରନ୍ତି । ସେଇଭଳି ଅନେକ ମୋବାଇଲ ନମ୍ବର ଦେଇ ହେଲପ କରିବା ଆଳରେ ଟଙ୍କା ହାଇଜାକ କରୁଛନ୍ତି ସାଇବର ଠକ। ଏଥିପାଇଁ ଅନଲାଇନରେ ଉପଲବ୍ଧ ହୋଇଛି ଠକଙ୍କ ନକଲି ଓ୍ବେବସାଇଟ।
ଯାହାକୁ ସଠିକ ଭାବେ ନ ପରଖିଲେ ଆପଣ ହରାଇପାରନ୍ତି ସର୍ବସ୍ବ। ଏମିତି ଏକ ହେଲପଲାଇନର ସହାୟତା ନେଇ ଖଣ୍ଡଗିରି ଅଞ୍ଚଳର ଜଣେ ବ୍ୟକ୍ତିଙ୍କ ଠାରୁ ସାଇବର ଠକ ଠକିନେଲେ ୨ଲକ୍ଷ ୨୯ ହଜାର ଟଙ୍କା । ସାଇବର ହେଲ୍ପ ଡେସ୍କରେ ଅଭିଯୋଗ ପରେ ତଦନ୍ତ ଆରମ୍ଭ କରିଛି ପୋଲିସ। ସୁଚନା ମୁତାବକ ଅଭିଯୋଗକାରୀ ଅକ୍ଷୟ କୁମାର ପାତ୍ର ଏସବିଆଇର କ୍ରେଡିଟ କାର୍ଡରେ ବିଲ ବାବଦକୁ ଏକ ହଜାର ଟଙ୍କା ପେମେଣ୍ଟ କରିଥିଲେ । କିନ୍ତୁ ଟଙ୍କା ବକେୟା ଥିବା ନେଇ ଏସବିଆଇ ପକ୍ଷରୁ ତାଙ୍କୁ ମେସେଜ ଆସିଥିଲା । ଏ ନେଇ ଗୁଗୁଲରେ ଏସବିଆଇ କ୍ରେଡିଟ କାର୍ଡରର ହେଲ୍ପ ଲାଇନ ନମ୍ବର ଖୋଜିଥିଲେ । ତେବେ ସେ ଯେଉଁ ନମ୍ବରକୁ କଲ କରିଥିଲେ ସେ ନମ୍ବର କଲ କରିବା ପରେ ସେ ସାଇବର ଅପରାଧର ଶିକାର ହୋଇଥିଲେ ।
ଭୁବନେଶ୍ବର ସାଇବର ହେଲ୍ପ ଡେସ୍କରେ ଏନେଇ ସେ ଅଭିଯୋଗ କରିଛନ୍ତି । ଅଭିଯୋଗ ପରେ ଜଣାପଡିଥିଲା ଅନଲାଇନରେ ସଠିକ ଭାବେ ନ ପରଖି ଠକ ଦେଇଥିବା ମାଳମାଳ ହେଲପ ଲାଇନ ନମ୍ବରକୁ କଲ କରି ଏପରି ଫସିଯାଇଥିଲେ। ଗୁଗୁଲରେ ସର୍ଚ୍ଚ କଲେ ଏହି ନମ୍ବରରେ ଆସୁଛି ପୁଳା ପୁଳା ସଂସ୍ଥାର ହେଲ୍ପ ଲାଇନ ନମ୍ବର । ଟିକେ ଭଲ କରି ଦେଖନ୍ତୁ । 8388008846 ଏହି ନମ୍ବର ଗୁଗୁଲରେ ସର୍ଚ୍ଚ କଲେ ଆସୁଛି ଏକାଧିକ ଏଜେନ୍ସି ନମ୍ବର ।
ଖଣ୍ଡଗିରିର ଅକ୍ଷୟ ପାତ୍ର ଏଭଳି ଶିକାର ପରେ ଏନେଇ ସତର୍କ କରାଇଛନ୍ତି । ତେବେ ଚଳିତ ମାସରେ ୨୦ ଦିନରେ ଏଭଳି ସମାନ ପ୍ରକାରର ୧୦ ଜଣଙ୍କ ଠାରୁ ପ୍ରାୟ ୨୫ ଲକ୍ଷ ଟଙ୍କା ଠକେଇ ହୋଇଥିବା ନେଇ ସାଇବର ହେଲ୍ପ ଡେସ୍କ ଓ ବିଭିନ୍ନ ଥାନାରେ ଅଭିଯୋଗ ହୋଇଛି । କୌଣସି ବ୍ୟାଙ୍କ କିମ୍ବା କମ୍ପାନୀ ହେଲ୍ପ ଲାଇନ ନମ୍ବର ଯୋଗଯୋଗ କରିବା ପାଇଁ ଚାହୁଁଛନ୍ତି । ତେବେ ସଠିକ ଓ୍ବେବସାଇଟ ବା ଗୁଗଲରେ ହେଲପ ଲାଇନକୁ ଯାଞ୍ଚ କରନ୍ତୁ ବୋଲି ଭୁବନେଶ୍ବର ଡିସିପି ଅପିଲ କରିଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
