ଭୁବନେଶ୍ବର: ରାଜଧାନୀରେ ପରିବା ଦର ଆକାଶ ଛୁଆଁ ହୋଇଛି । ଯେଉଁ ପରିବାକୁ ଛୁଇଁବେ ଦର ୫୦ରୁ ଉପରେ । କିଣିବା ତ ଦୂରର କଥା, ଦର ଶୁଣି ବଜାର ଯିବାକୁ ମନଊଣା କରୁଛନ୍ତି ଗ୍ରାହକ । ସମୟ ଏମିତି ଯେ ପରିବା ବ୍ୟବସାୟୀ ମଧ୍ୟ କିଲୋ ପ୍ରତି ଦର ଡାକିବା ପରିବର୍ତ୍ତେ ଅଧକିଲୋ ଓ ୨୫୦ ଗ୍ରାମ ପ୍ରତି ଦର ଡାକୁଛନ୍ତି ।
ଆଜି ଭୁବନେଶ୍ବରର ବିଭିନ୍ନ ବଜାରରେ ବିନ୍ସ କିଲୋ ପ୍ରତି 80 ଟଙ୍କା, କ୍ୟାପିସିକମ୍ 70 ଟଙ୍କା, ପୋଟଳ 60 ଟଙ୍କା, ବାଇଗଣ 70 ଟଙ୍କା ପ୍ରତି କିଲୋ ଦର ରହିଛି । ପିଆଜ କେଜି 50 ଟଙ୍କାରୁ କମ୍ରେ ମିଳୁନାହିଁ । କୋରୋନା ମହାମାରୀ ଯୋଗୁଁ ଲୋକଙ୍କ ଆର୍ଥିକ ସ୍ଥିତି ଦୁର୍ବଳ ହୋଇଛି । ଏଭଳି ସ୍ଥିତିରେ ପରିବାର ଦର ବୃଦ୍ଧି ସାଧାରଣ ଲୋକଙ୍କ ଚିନ୍ତା ବଢ଼ାଇ ଦେଇଛି । ଲୋକଙ୍କ ହାଣ୍ଡିଶାଳ ଉପରେ ପରିବା ଦରବୃଦ୍ଧି ପ୍ରଭାବ ପକାଇଛି ।
ପୂର୍ବରୁ ଯେଉଁମାନେ ଏକ କେଜି ପରିବା କିଣୁଥିଲେ ସେମାନେ ଏବେ ଏହାକୁ ଅଧା କରିଦେଇଛନ୍ତି । ଅନ୍ୟପଟେ ବ୍ୟବସାୟୀ ମଧ୍ୟ ଦର ବୃଦ୍ଧି ପାଇଁ ବ୍ୟବସାୟ କମିଥିବା କଥା କହିଛନ୍ତି ।
ଲଗାତାର ବାତ୍ୟା, ବନ୍ୟା ଫଳରେ ବିଭିନ୍ନ ସ୍ଥାନରୁ ଆମଦାନୀ ହେବାକୁ ଥିବା ପରିବା ନଷ୍ଟ ହୋଇଯାଇଛି । ଯାହାଫଳରେ ପରିବା ଦର ବୃଦ୍ଧି ପାଇଛି ବୋଲି କହିଛନ୍ତି ବ୍ୟବସାୟୀ ।
ବାହାର ରାଜ୍ୟରୁ ପରିବା ଆମଦାନୀ ବଢ଼ିବା ଯୋଗୁଁ ପରିବା ଦର ମଧ୍ୟ ବଢିବାର ମୂଳ କାରଣ ପାଲଟିଛି । ଆଗକୁ କାର୍ତ୍ତିକ ମାସ ଆସୁଛି । ଆଉ ଏକ ମାସରୁ ଦୁଇ ମାସ ଯାଏଁ ଦରବୃଦ୍ଧି ଲାଗି ରହିପାରେ ବୋଲି ଅନୁମାନ କରିଛନ୍ତି ବ୍ୟବସାୟୀ ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
