ପୁରୀ: ଜିଲ୍ଲରେ ୧୫ରୁ ୧୮ ବର୍ଷ ବୟସ ପର୍ଯ୍ୟନ୍ତ କିଶୋର କୁଶୋରୀ ମାନଙ୍କୁ କୋଭିଡ ଟୀକାକରଣ ଆରମ୍ଭ ହୋଇଛି । ଜିଲ୍ଲାପାଳ ସମର୍ଥ ବର୍ମା କମଳା ଦେବୀ ମାତୃ ମଙ୍ଗଳ ସ୍ବାସ୍ଥ୍ୟ କେନ୍ଦ୍ରରେ ଜିଲ୍ଲାରେ ଏହି ଅଭିଯାନର ଶୁଭାରମ୍ଭ କରିଛନ୍ତି । ଜିଲ୍ଲାରେ ଏହି ବୟସ ବର୍ଗରେ ୯୦ ହଜାର ୯୬୧ ଜଣ ଥିବାବେଳେ ସେମାନଙ୍କୁ କୋଭାକ୍ସିନ ଟିକା ପ୍ରଦାନ କରାଯାଉଛି । ଆସନ୍ତା ଏକ ମାସ ମଧ୍ୟରେ ଏହି ବୟସ ବର୍ଗର ସମସ୍ତଙ୍କୁ ଟିକା ଦିଆଯିବା ଲକ୍ଷ୍ୟ ରଖାଯାଇଛି ।
ଆଜିପାଇଁ ଅନଲାଇନରେ ୪ ହଜାର ୩ ଶହ ଜଣଙ୍କ ପାଇଁ ସ୍ଲଟ ବୁକିଂର ବ୍ୟବସ୍ଥା ଥିବାବେଳେ ତିନି ହଜାର ୩୬୮ ଜଣ ଟିକା ନେଇଥିବା ଜଣାପଡିଛି । ଉଭୟ ଅନଲାଇନ ସ୍ଲଟ ବୁକିଂ କରିଥିବା କିମ୍ବା ସିଧାସଳଖ ଭାବେ ଟୀକାକରଣ କେନ୍ଦ୍ରକୁ ଆସୁଥିବା କିଶୋର କିଶୋରୀଙ୍କୁ ମଧ୍ୟ ଟିକା ଦିଆଯିବା ବ୍ୟବସ୍ଥା କରାଯାଇଛି । ଟୀକାକରଣ କେନ୍ଦ୍ରକୁ ଆଧାର କାର୍ଡ କିମ୍ବା ବିଦ୍ୟାଳୟ ପରିଚୟପତ୍ର ଆଣିବାକୁ କିଶୋର କିଶୋରୀଙ୍କୁ ପରାମର୍ଶ ଦିଆଯାଇଛି । ପ୍ରାଥମିକ ଭାବେ ଜିଲ୍ଲାର ୧୧ଟି ବ୍ଲକ ସହ ପୁରୀ ସହରର କମଳାଦେବୀ ମାତୃମଙ୍ଗଳ ସ୍ବାସ୍ଥ୍ୟକେନ୍ଦ୍ର, ଚନ୍ଦନ ହଜୁରୀ ଓ ସ୍ବର୍ଗଦ୍ଵାର ସହାରଞ୍ଚଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏହି ବ୍ୟବସ୍ଥା କରାଯାଇଛି । ଆବଶ୍ୟକ ପଡିଲେ ସ୍ବତନ୍ତ୍ର ଅଭିଯାନ ସହାୟତାରେ ଏହି ବର୍ଗରେ ଶତପ୍ରତିଶତ ଟୀକାକରଣ କରାଯିବ ବୋଲି ଜିଲ୍ଲାପାଳ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
