ଭୁବନେଶ୍ବର: ପଞ୍ଚାୟତ ନିର୍ବାଚନରେ କଂଗ୍ରେସକୁ ମାତ୍ର ୧୩ ପ୍ରତିଶତ ଭୋଟ ମିଳିଛି । ଏବେ ବି ରାଜ୍ୟରେ ନବୀନ କ୍ରେଜ ସର୍ବାଗ୍ରେ ରହିଛି ଏହାର ସ୍ପଷ୍ଟ ସୂଚନା ପଞ୍ଚାୟତ ଜନମତରୁ ହିଁ ଜଣାପଡିଛି । ପଞ୍ଚାୟତ ନିର୍ବାଚନରେ କଂଗ୍ରେସର ନୈରାଶ୍ୟଜନକ ପ୍ରଦର୍ଶନ ପୌର ନିର୍ବାଚନ ଉପରେ ଫୋକସ କରିବା ଆରମ୍ଭ କରି ଦେଇଛି । ପଞ୍ଚାୟତ ଭଳି କଂଗ୍ରେସ ପୌର ନିର୍ବାଚନରେ ପଛରେ ପଡ଼ିବ ନାହିଁ ଦୃଢ଼ୋକ୍ତି ଦେଇଛନ୍ତି କଂଗ୍ରେସର ବରିଷ୍ଠ ନେତା ସୁର ରାଉତରାୟ ।
କଂଗ୍ରେସ ବିଧାୟକ ସୁର ରାଉତରାୟ କହିଛନ୍ତି ଯେ, "ଗ୍ରାମାଞ୍ଚଳରେ ଜନସାଧାରଣ ଏତେ ସଚେତନ ନୁହଁନ୍ତି । ହେଲେ ସହରାଞ୍ଚଳରେ ଲୋକେ ସଚେତନ ସେଠାରେ ଅର୍ଥ ଦେଇ ଭୋଟ କେହି କିଣି ପାରିବେନି । ଶାସକ ଦଳ ଅର୍ଥର ଲୋଭ ଦେଖାଇ ଭୋଟ ହାତେଇଲା । ପଞ୍ଚାୟତ ନିର୍ବାଚନ ଭଳି ଆମେ ପୌର ନିର୍ବାଚନରେ ପଛରେ ରହିବୁ ନାହିଁ ।"
ସରକାର ବିଭିନ୍ନ ଯୋଜନା ଲୋଭ ଦେଖାଇ ଭୋଟ କିଣିଥିବା ଅଭିଯୋଗ କରିଛନ୍ତି ସୁର ରାଉତରାୟ । ତେବେ କଂଗ୍ରେସ ପୌର ନିର୍ବାଚନ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିଛି । ପ୍ରାର୍ଥୀ ଚୂଡ଼ାନ୍ତ ହୋଇସାରିଛି । ଖୁବଶୀଘ୍ର ଦଳ ପକ୍ଷରୁ ଘୋଷଣା କରାଯିବ । କଟକରେ ମେୟର ପ୍ରାର୍ଥୀ ଭାବେ ନଗର କଂଗ୍ରେସ ସଭାପତି ଗିରିବାଳା ବେହେରାଙ୍କ ନାମ ଘୋଷଣା କରି ସାରିଛି କଂଗ୍ରେସ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
