ନୂଆପଡା: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିନିକିଆ ନୂଆପଡା ଜିଲ୍ଲା ଗ୍ରସ୍ତ କରି ଫେରିଯାଇଛନ୍ତି । 4000 କୋଟି ଟଙ୍କାର ପ୍ୟାକେଜ ଘୋଷଣା କରିବା ସହ ବହୁ ପ୍ରତୀକ୍ଷୀତ ଲୋୟର ଇନ୍ଦ୍ର ଜଳସେଚନ ପ୍ରକଳ୍ପକୁ ଉଦଘାଟନ କରିଛନ୍ତି ।
ସକାଳ 10ଘଣ୍ଟା 40ମିନିଟ ସମୟରେ ସ୍ବତନ୍ତ୍ର ହେଲିକେପ୍ଟର ଯୋଗେ ଗୋଟାମା ସ୍ଥିତ ଏୟାରଷ୍ଟ୍ରିପରେ ପହଞ୍ଚିଥିଲେ ନବୀନ । ପରେ 11ଘଣ୍ଟା 30 ମିନିଟ ସମୟରେ ଲୋୟର ଇନ୍ଦ୍ର ଜଳସେଚନ ପ୍ରକଳ୍ପ ନିକଟସ୍ଥ ଅସ୍ଥାୟୀ ହେଲିପ୍ୟାଡରେ ପହଞ୍ଚି ବହୁ ପ୍ରତୀକ୍ଷିତ ଲୋୟର ଇନ୍ଦ୍ର ଜଳ ସେଚନ ପ୍ରକଳ୍ପ କୁ ଲୋକାର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପରେ ପୁଣି ହେଲିକେପ୍ଟର ଯୋଗେ 12ଘଣ୍ଟା ସମୟରେ ଖଡ଼ିଆଳ ସ୍ଥିତ ରାଜା ଆର୍ତ୍ତତ୍ରାଣ ହାଇସ୍କୁଲ ଖେଳ ପଡ଼ିଆ ସ୍ଥିତ ଅସ୍ଥାୟୀ ହେଲିପ୍ୟାଡରେ ପହଞ୍ଚି ଆୟୋଜିତ ସାଧାରଣ ସଭାକୁ ସମ୍ବୋଧନ କରିଛନ୍ତି । ନୂଆପଡା ଜିଲ୍ଲାବାସୀଙ୍କୁ ପ୍ରଥମେ ଜୁହାର କହି ଉଦବୋଧନ ଆରମ୍ଭ କରିଛନ୍ତି ମୁଖ୍ୟମନ୍ତ୍ରୀ । ଏହି ଗ୍ରସ୍ତରେ ମୁଖ୍ୟମନ୍ତ୍ରୀ ରାସ୍ତାଘାଟ,ଵିଶୁଦ୍ଧ ପାନୀୟଜଳ, ଟାଉନହଲ,ବସ ଷ୍ଟାଣ୍ଡ ଭଳି ଏକାଧିକ ନୂତନ ପ୍ରକଳ୍ପ ପାଇଁ 4000କୋଟି ଅର୍ଥ ବରାଦ କରିଛନ୍ତି ନବୀନ ।
ନୂଆପଡା ଜ଼ିଲ୍ଲା ଏକ ମରୁଡିପ୍ରବଣ ଜିଲ୍ଲା ହୋଇଥିବାବେଳେ ଲୋୟର ଇନ୍ଦ୍ର ଜଳସେଚନ ପ୍ରକଳ୍ପ ଦ୍ବାରା ଜିଲ୍ଲା ଶସ୍ୟଶ୍ୟାମଳା ହୋଇ ହସି ଉଠିବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏଭଳି ଯୁଗାନ୍ତ କାରୀ ପଦକ୍ଷେପ ପାଇଁ ନେତା,ମନ୍ତ୍ରୀ,ସାଂସଦ ଓ ପ୍ରଶାସନ ପ୍ରଶଂସା କରିଛନ୍ତି ।
ନୂଆପଡାରୁ ମୋତିଲାଲା ବାଗ,ଇଟିଭି ଭାରତ
