ଭୁବନେଶ୍ବର: ଆସନ୍ତା 20 ତାରିଖରେ ପାଟକୁରା ନିର୍ବାଚନ । ନିଜ ଅଞ୍ଚଳ ପାଇଁ ପ୍ରାର୍ଥୀ ବାଛିବେ ପାଟକୁରାବାସୀ । ଏଥିପାଇଁ ନିର୍ବାଚନ ଅଧିକାରୀ ପକ୍ଷରୁ ମଧ୍ୟ ସମସ୍ତ ପ୍ରସ୍ତୁତି ଶେଷ ହୋଇଛି । ସକାଳ 7ଟାରୁ ସନ୍ଧ୍ୟା 6ଟା ପର୍ଯ୍ୟନ୍ତ ମତଦାନ ସାବ୍ୟସ୍ତ କରିବେ ମତଦାତା ।
ସୂଚନାନୁସାରେ, ପାଟକୁରାରେ ମୋଟ 309ଟି ପୋଲିଂ ଭୋଟ ଗ୍ରହଣ କେନ୍ଦ୍ର ରହିଛି । ମୋଟ 10 ଜଣ ପ୍ରାର୍ଥୀ ନିର୍ବାଚନ ମୈଦାନରେ ନିଜର ଭାଗ୍ୟ ପରୀକ୍ଷା କରିବେ । ସେଥିମଧ୍ୟରୁ 7 ଜଣ ପୁରୁଷ ପ୍ରାର୍ଥୀ ଥିବାବେଳେ ଜଣେ ମହିଳା ପ୍ରାର୍ଥୀ ନିର୍ବାଚନରେ ପ୍ରତିନ୍ଦ୍ବନ୍ଦିତା କରୁଛନ୍ତି । ପାଟକୁରାରେ ମୋଟ 2 ଲକ୍ଷ 44ହଜାର 7ଶହ 47ଜଣ ମତଦାତା ରହିଛନ୍ତି । ତନ୍ମଧରୁ 1 ଲକ୍ଷ 27ହଜାର 4ଶହ 31 ଜଣ ପୁରୁଷ ଏବଂ 1 ଲକ୍ଷ 17 ହଜାର 3 ଶହ 6 ଜଣ ମହିଳା ଭୋଟର ରହିଛନ୍ତି ।
ତେବେ ଏହି ଭୋଟ ଗ୍ରହଣ କେନ୍ଦ୍ରରେ ମୋଟ 1700 ପୋଲିଂ ଅଧିକାରୀଙ୍କୁ ନିୟୋଜିତ କରାଯାଇଛି । ଏହା ସହ 5 ଜଣ ଜୋନାଲ ସେକ୍ଟର ମାଜିଷ୍ଟ୍ରେଟଙ୍କୁ ନିଯୁକ୍ତ କରାଯାଇଛି । ଏଥିସହିତ 466 ଟି ଗାଡି ନିୟୋଜିତ ହୋଇଛି । ପାଟକୁରାରେ ମୋଟ 138ଟି ଅତି ସମ୍ବେଦନଶୀଳ ବୁଥ୍ ରହିଥିବାରୁ ସ୍ବତନ୍ତ୍ର ସୁରକ୍ଷା ବ୍ୟବସ୍ଥା କରାଯାଇଛି ।
ମୁକ୍ତ, ଅବାଧ ଓ ନିରପେକ୍ଷ ମତଦାନ ପାଇଁ ପୋଲିସ ପକ୍ଷରୁ ଜିଲ୍ଲାର ବିଭିନ୍ନ ସ୍ଥାନରେ ଚଢାଉ କରାଯାଇ ମଦ ଜବତ କରାଯାଇଛି । ତେବେ ଜିଲ୍ଲାର କାଁ ଭାଁ ସ୍ଥାନରେ ନିର୍ବାଚନୀ ହିଂସା ଦେଖିବାକୁ ମିଳୁଥିବାବେଳେ ନିର୍ବାଚନର ସମସ୍ତ ପ୍ରକ୍ରିୟା କ୍ୟାମେରାରେ ରେର୍କଡ କରାଯିବା ନେଇ ନିର୍ବାଚନ ଅଧିକାରୀ ସୂଚନା ଦେଇଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
