ଭୁବନେଶ୍ବର: ପ୍ରଥମେ ନୋଟିସ । ଏବେ କାର୍ଯ୍ୟାନୁଷ୍ଠାନ ଚେତାବନୀ । ବେଆଇନ କଲ୍ୟାଣ ମଣ୍ଡପ ବିରୋଧରେ ବିଏମସି ଖଡଗହସ୍ତ । ଦୁଇ ମାସ ମହଲତ ପରେ ଫେବ୍ରୁଆରୀ ପହିଲାରୁ ପୁରିବାକୁ ଯାଉଛି ବିଏମସିର ବେଆଇନ କଲ୍ୟାଣ ମଣ୍ଡପ ବିରୋଧରେ କାର୍ଯ୍ୟାନୁଷ୍ଠାନର ନୋଟିସ । ଯେଉଁମାନେ ଦୀର୍ଘଦିନ ଧରି ପାର୍କିଂ ବ୍ୟବସ୍ଥା କରିନଥିବେ, ନୀତିନିୟମ ମାନୁନଥିବା କଲ୍ୟାଣ ମଣ୍ଡପ ଗୁଡିକ ବିରୋଧରେ କାର୍ଯ୍ୟାନୁଷ୍ଠାନ ନେବ ବୋଲି ବିଏମସି କର୍ତ୍ତୃପକ୍ଷ ପୂର୍ବରୁ ସୂଚନା ଦେଇସାରିଥିଲେ।
ଏବେ କଣ୍ଟ ପୁରୁଥିବାରୁ କଲ୍ୟାଣ ମଣ୍ଡପ ମାଲିକଙ୍କ ଭିତରେ କୋକୁଆ ଭୟ ସୃଷ୍ଟି ହେଇଛି। ବିଏମସି କର୍ତ୍ତୃପକ୍ଷଙ୍କ ସୂଚନା ଅନୁସାରେ ଆଉ ମହଲତ ଦିଆଯିବନି । ଏଣିକି ନିୟମ ବହିର୍ଭୁତ କଲ୍ୟାଣ ମଣ୍ଡପ ପରିଚାଳନା କରୁଥିଲେ ହେବ କଡା କାର୍ଯ୍ୟାନୁଷ୍ଠାନ। ଏନେଇ ବିଏମସି ସିଧା ଚେତାବନୀ ଶୁଣାଇଦେଇଛି । ତେବେ ବିଏମସିର ଏହି ଆଭିମୁଖ୍ୟକୁ ନେଇ ଏବେ ମଣ୍ଡପ ମାଲିକ ଓ ସାଧାରଣ ଜନତା ଚିନ୍ତାରେ । କାରଣ ଆରମ୍ଭ ହୋଇସାରିଛି ବିବାହ ଋତୁ । ବର୍ତ୍ତମାନ ବିବାହ, ବ୍ରତ ପାଇଁ ରାଜଧାନୀର ସମସ୍ତ ମଣ୍ଡପ ଗୁଡିକ ବୁକିଙ୍ଗ ସରିଛି । ଏପରି ସ୍ଥଳେ ବିଏମସିର କାର୍ଯ୍ୟକୁ ନେଇ ସବୁଠି ଲାଗିରହିଛି ଆଶା ଆଶଙ୍କା । କାହିଁକି ନା ଅନେକ ଗ୍ରାହକ ବାହାଘର ବ୍ରତଘର ପାଇଁ ସବୁ ବ୍ୟବସ୍ଥା କରିସାରିଛନ୍ତି । ଫଳରେ ଗ୍ରାହକଙ୍କ ଠୁ କଲ୍ୟାଣ ମଣ୍ଡପ ମାଲିକ ଚିନ୍ତାରେ ।
ସେପଟେ ବିଏମସି କମିଶନର କହିଛନ୍ତି ସବୁ ବେଆଇନ କଲ୍ୟାଣ ମଣ୍ଡପ ଗୁଡିକୁ ନୋଟିସ ଜାରି କରାଯାଇଛି। ମୁଖ୍ୟତଃ ଦୁଇଟି ଜିନିଷ ଉପରେ ଗୁରୁତ୍ବ ଦିଆଯାଇଛି, ପାର୍କିଂ ଏବଂ ଅଗ୍ନି ନିରାପତ୍ତା ବ୍ୟବସ୍ଥା । ଜାନୁଆରୀ ୩୧ ସୁଦ୍ଧା ସମସ୍ତ ଆବଶ୍ୟକୀୟ କାଗଜପତ୍ର ପୈଠ କରିବାକୁ କୁହାଯାଇଛି। ଏବେ ସୁଦ୍ଧା ୧୫ ରୁ ୨୦ ଜଣ ଡକୁମେଣ୍ଟ ଦେଇଛନ୍ତି । ବିଏମସି ଦ୍ବାରା ଗଠିତ ସ୍କୃଟିଂନି କମିଟି ସମସ୍ତ ଡକୁମେଣ୍ଟ ତଦାରଖ କରିବେ ଫେବ୍ରୁଆରୀ ପହିଲାରୁ ବିଭିନ୍ନ ପର୍ଯ୍ୟାୟରେ ବେଆଇନ କଲ୍ୟାଣ ମଣ୍ଡପ ସିଲ ହେବ ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
