ଭୁବନେଶ୍ବର: ସହରରେ ବିଏମସି ପାର୍କିଂ ଛଡା ଅନ୍ୟ ସ୍ଥାନରେ ଦେଉଛନ୍ତି କି ପାର୍କିଂ ଫି? କେବେ ବି ଦିଅନ୍ତୁନି । ଯଦି କେହି ପାର୍କିଂ ଫି ମାଗୁଛି ସଙ୍ଗେ ସଙ୍ଗେ ବିଡିଏକୁ ସୂଚନା ଦିଅନ୍ତୁ । ସେମାନଙ୍କ ଉପରେ ଏଣିକି କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏନେଇ ବିଏମସି ପକ୍ଷରୁ ନୋଟିସ ଜାରି କରାଯାଇଛି । ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏନେଇ ଟୁଇଟରରେ ଉଲ୍ଲେଖ କରିଛନ୍ତି ।
ସ୍ମାର୍ଟ ସିଟି ଭୁବନେଶ୍ବରରେ ସପିଙ୍ଗ ମଲ, ଆବାସିକ ଗୃହ, ମଲ୍ଟିପ୍ଲେକ୍ସ, ହସ୍ପିଟାଲ ଏବଂ ଆପାର୍ଟମେଣ୍ଟରେ ଏବେ ପାର୍କିଂ ଫି ଆଦାୟ କରିବା ଅବୈଧ । ବିଡିଏର ପ୍ଲାନିଂ ଓ ବିଲ୍ଡିଂ ଷ୍ଟାଣ୍ଡାର୍ଡ୍ସ ରେଗୁଲେସନ ଆଧାରରେ ବ୍ୟବସାୟିକ ପ୍ରତିଷ୍ଠାନ ନିଜସ୍ବ ପରିସୀମା ଭିତରେ ପାର୍କିଂ ଫି ଆଦାୟ କରିପାରିବେ ନାହିଁ । ଏହି ସୂଚନା ଦେଇଛନ୍ତି ବିଡିଏ କର୍ତ୍ତୃପକ୍ଷ । ଯଦି କେହି ଏଭଳି ବେଆଇନ ପାର୍କିଂଗ ଫି ଆଦାୟ କରେ ସେମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଡିଏ ପକ୍ଷରୁ ସ୍ପଷ୍ଟ କରାଯାଇଛି । ଏହାସହ ସମସ୍ତ ଅନୁଷ୍ଠାନ ଗୁଡିକ ମାସେ ଭିତରେ ନିଜସ୍ବ ପାର୍କିଂ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି ।
ପୂର୍ବରୁ ଭୁବନେଶ୍ବରରେ ସପିଙ୍ଗ ମଲ ଠାରୁ ଆରମ୍ଭ କରି ବଡ ବଡ ବ୍ୟବସାୟିକ ପ୍ରତିଷ୍ଠାନ ତଥା ଆବାସିକ ଗୃହ ପାର୍କିଂ ଫି ଆଦାୟ କରୁଥିଲେ । ଏହାକୁ ବିଡିଏ ବିରୋଧ କରିବା ସହ ବେଆଇନ ପାର୍କିଂ ଫିକୁ ଉଠାଇବାକୁ ନିର୍ଦ୍ଦେଶ ଦେଇଛି । ପାର୍କିଂ ବ୍ୟବସ୍ଥା ରହିଥିଲେ ହିଁ କୌଣସି ବିଲ୍ଡିଂକୁ ବିଡିଏ ଅନୁମୋଦନ ମିଳିଥାଏ । ତେଣୁ ସେମାନେ ଲୋକମାନଙ୍କୁ ମାଗଣାରେ ସେବା ଯୋଗଇବା କଥା । କିନ୍ତୁ ତାହା କେତେକ କରୁ ନଥିବାରୁ ବିଡିଏ ଏହି ନିଷ୍ପତ୍ତି ନେଇଛି । ସହରରେ କେବଳ ବିଏମସି ଦ୍ବାରା ନିର୍ଦ୍ଧାରିତ ସ୍ଥାନ ଗୁଡିକରେ ପାର୍କିଂ ଫି ଆଦାୟ କରାଯିବ । ଯଦି କୌଣସି ଅନୁଷ୍ଠାନରେ ପାର୍କିଂ ଫି ଆଦାୟ ହେବାର ସୂଚନା ମିଳେ ତା ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଡିଏ ଉପାଧ୍ୟକ୍ଷ ପ୍ରେମଚନ୍ଦ୍ର ଚୌଧୁରୀ କହିଛନ୍ତି । ଖାଲି ସେତିକି ନୁହେଁ ପ୍ରତ୍ୟେକ ବ୍ୟବସାୟିକ ପ୍ରତିଷ୍ଠାନ, ଆପାର୍ଟମେଣ୍ଟ, ହସ୍ପିଟାଲକୁ ମାସେ ଭିତରେ ପାର୍କିଂ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି ।
ସୂଚନାଯୋଗ୍ୟ, ଭୁବନେଶ୍ବରରେ ବେଆଇନ ପାର୍କିଂ ଫି ଆଦାୟ ଦୀର୍ଘ ବର୍ଷ ହେଲା ଚାଲିଥିଲା । ଏପରିକି ବିଏମସିର କିଛି ଅସାଧୁ ଅଧିକାରୀ ଓ କର୍ମଚାରୀ ଏ ବେଆଇନ ପାର୍କିଂ ଫି ଆଦାୟ କରୁଥିବାର ବିଭିନ୍ନ ସମୟରେ ଅଭିଯୋଗ ଆସିଥିଲା । ତେବେ ଏହି ନିୟମ କେତେଦୂର କାର୍ଯ୍ୟକାରୀ ହେଉଛି ତାହା ସମୟ କହିବ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
