ଭୁବନେଶ୍ବର: ଦେଶର ପ୍ରମୁଖ 17ଟି ପର୍ଯ୍ୟଟନସ୍ଥଳୀର ବିକାଶ ପାଇଁ ସ୍ବତନ୍ତ୍ର ବଜେଟ ଘୋଷଣା କରିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । କିନ୍ତୁ ଓଡିଶାର କୌଣସି ସ୍ଥାନ ଏଥିରେ ତାଲିକାଭୁକ୍ତ ନଥିବାରୁ ଶ୍ରୀମନ୍ଦିର ଓ ସୂର୍ଯ୍ୟମନ୍ଦିରକୁ ସାମିଲ କରିବାକୁ ଦାବି କରିଛନ୍ତି ଓଡିଶାର ବିଜେପି ସାଂସଦମାନେ ।
ଶ୍ରୀମନ୍ଦିର ଓ ସୂର୍ଯ୍ୟମନ୍ଦିରକୁ ଆଦର୍ଶ ପର୍ଯ୍ୟଟନସ୍ଥଳୀରେ ସାମିଲ ନେଇ ରାଜ୍ୟ ବିଜେପି ସାଂସଦମାନେ କେନ୍ଦ୍ର ପର୍ଯ୍ୟଟନ ମନ୍ତ୍ରୀଙ୍କୁ ଚିଠି ଲେଖିଛନ୍ତି । 4କୋଟି ଓଡିଆଙ୍କ ଗାରିମା ଓ ଓଡିଶାର ଗୌରବ ପୁରୀ ଜଗନ୍ନାଥ ମନ୍ଦିର ତଥା କୋଣାର୍କ ଭଳି ପବିତ୍ରସ୍ଥଳୀ । ଏମିତିକି ହିନ୍ଦୁଙ୍କ ପବିତ୍ର ଚାରିଧାମ ମଧ୍ୟରୁ ପୁରୀ ଜଗନ୍ନାଥ ମନ୍ଦିର ଅନ୍ୟତମ । କିନ୍ତୁ ଏହାକୁ ଆଦର୍ଶ ପର୍ଯ୍ୟଟନ ସ୍ଥଳୀ ଭାବେ ଗଣିବାକୁ ଭୁଲି ଯାଇଛନ୍ତି ସରକାର ।
ଖାଲି ଓଡିଶା ନୁହେଁ ବିଶ୍ବର ଲକ୍ଷ ଲକ୍ଷ ପର୍ଯ୍ୟଟକଙ୍କ ସୁଅ ଛୁଟିଥାଏ ପୁରୀ ଓ କୋଣାର୍କକୁ । ତେଣୁ ଶ୍ରୀମନ୍ଦିର ଓ କୋଣାର୍କକୁ ଆଦର୍ଶ ପର୍ଯ୍ୟଟନସ୍ଥଳୀରେ ସାମିଲ କରି ଏହାର ବିକାଶ କରିବାକୁ କେନ୍ଦ୍ର ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ପ୍ରହ୍ଲାଦ ସିଂ ପଟେଲଙ୍କୁ ଚିଠି ଲେଖି ଅନୁରୋଧ କରିଛନ୍ତି ବିଜେପି ସାଂସଦ ଗଣ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
