ଭୁବନେଶ୍ବର: ପୁରୀ ଜିଲ୍ଲା ବ୍ରହ୍ମଗିରି ବିଧାନସଭା ମଣ୍ଡଳୀର ପୂର୍ବତନ ବିଧାୟକ ସଞ୍ଜୟ ଦାସବର୍ମାଙ୍କ PA ଚିତ୍ତରଞ୍ଜନ ପଲେଇଙ୍କ ହତ୍ୟା ପ୍ରସଙ୍ଗ । ନୈତିକତା ଦୃଷ୍ଟିରୁ ରାଜ୍ୟ ଯୋଜନା ବୋର୍ଡ଼ ଉପାଧ୍ୟକ୍ଷ ପଦବୀରୁ ସଞ୍ଜୟଙ୍କ ଇସ୍ତଫା ଦାବି କଲା ବିଜେପି । ମଙ୍ଗଳବାର ପ୍ରେସମିଟ କରି ହତ୍ୟାକାଣ୍ଡର ନିରପେକ୍ଷ ତଦନ୍ତ ପାଇଁ ମଧ୍ୟ ବିଜେପି ଦାବି କରିଛି ।
ମୃତ୍ୟୁକୁ ନେଇ ରାଜନୀତି କରିବାର ଉଦ୍ଦେଶ୍ୟ ନାହିଁ । କିନ୍ତୁ ଯେତେବେଳେ ହତ୍ୟା ହେଉଛି ଏବଂ ରହସ୍ୟମୟ ହେଉଛି, ପରିବାର ଲୋକେ ରାଜନୈତିକ ଵ୍ୟକ୍ତିଙ୍କର ସମ୍ପୃକ୍ତି ଅଭିଯୋଗ ଆଣୁଛନ୍ତି । ଗତକାଲି (ସୋମବାର) ଚିତ୍ତରଞ୍ଜନଙ୍କ ପରିବାର ଲୋକେ ଅଭିଯୋଗ କରିଛନ୍ତି ଯେ ହତ୍ୟାରେ ଯୋଜନା ବୋର୍ଡ ଉପାଧ୍ୟକ୍ଷଙ୍କର ହାତ ରହିଛି । ତେବେ କେବଳ ବ୍ରହ୍ମଗିରି ନୁହେଁ, ସାରା ଓଡି଼ଶାରେ ଶାସକ ଦଳ ନେତାଙ୍କ ସମ୍ପୃକ୍ତି ଅନେକ ହତ୍ୟାକାଣ୍ଡ ଓ ଅପରାଧରେ ଅଭିଯୋଗ ହେଉଛି । ପୋଲିସ ମଧ୍ୟ ଚିତ୍ତରଞ୍ଜନଙ୍କର ହତ୍ୟା ହୋଇଛି ବୋଲି ସ୍ପଷ୍ଟ କରିଛି ।
ଏହା ବି ପଢନ୍ତୁ: ନଈ ପଠାରୁ ମିଳିଲା ସଞ୍ଜୟ ଦାସବର୍ମାଙ୍କ PSOଙ୍କ ମୃତଦେହ, ହତ୍ୟା ସନ୍ଦେହ
ଯେହେତୁ ସଞ୍ଜୟ ଦାସ ବର୍ମା ଗୋଟିଏ ସାମ୍ବିଧାନିକ ପଦବୀରେ ଅଛନ୍ତି, ମୁଖ୍ୟମନ୍ତ୍ରୀ ତୁରନ୍ତ ତାଙ୍କୁ ଇସ୍ତଫା ଦେବା ପାଇଁ ନିର୍ଦ୍ଦେଶ ଦିଅନ୍ତୁ । ପୋଲିସ ତଦନ୍ତକୁ ଦିଗହରା କରନ୍ତୁ ନାହିଁ । 2012ରେ ଡାକ୍ତରାଣୀ ମାଧବୀଲତାଙ୍କର ହତ୍ୟା ହୋଇଥିଲା । ପୀଡ଼ିତାଙ୍କ ବାପା ସଞ୍ଜୟଙ୍କ ନାଁରେ ଅଭିଯୋଗ ଆଣିଥିଲେ । ହେଲେ ତାଙ୍କୁ ନ୍ୟାୟ ମିଳିଲା ନାହିଁ ବୋଲି ମାଧବୀଲତାଙ୍କ ବାପା କହିଥିଲେ ବୋଲି ବିଜେପି କହିଛି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
