ଭୁବନେଶ୍ବର: ବସରେ ବିଦ୍ୟୁତ ତାର ଲାଗିବା ଘଟଣାକୁ ନେଇ ଜୋର ଧରିଛି ରାଜନୀତି। ବିରୋଧୀଙ୍କ ନିଶାନାରେ ଶକ୍ତି ମନ୍ତ୍ରୀ। ତୁରନ୍ତ ନୈତିକ ଦାୟିତ୍ବ କାନ୍ଧକୁ ନେବା ସହ ଇସ୍ତଫା ଦିଅନ୍ତୁ ବୋଲି ଦାବି କରିଛି ବିଜେପି। ସାମ୍ବାଦିକ ସମ୍ମିଳନୀରେ ଏହା କହିଛନ୍ତି ବିଜେପି ମୁଖପାତ୍ର ଗୋଲକ ମହାପାତ୍ର।
ବିଜେପିର ଅଭିଯୋଗ, 'ବିଦ୍ୟୁତ ତାର ଲାଗି ଦୁର୍ଘଟଣା ନୂଆ ଘଟଣା ନୁହେଁ । ଘଟଣାକୁ ୨୪ ଘଣ୍ଟା ବିତିଗଲାଣି । ସରକାର କୁମ୍ଭକର୍ଣ୍ଣ ନିଦରେ ଶୋଇଛନ୍ତି ।ଏପର୍ଯ୍ୟନ୍ତ ନୈତିକତା ଦୃଷ୍ଟିରୁ ଶକ୍ତିମନ୍ତ୍ରୀ ଇସ୍ତଫା ଦେଇନାହାଁନ୍ତି । ସାଉଥକୋ ଅଧିକାରୀଙ୍କ ବିରୋଧରେ ହତ୍ୟା ମାମଲା ଦାୟର କରିବା କଥା କିନ୍ତୁ ତାହା ହୋଇନାହିଁ '।
'10 ଜଣଙ୍କ ହତ୍ୟା ଅଭିଯୋଗରେ ସେମାନଙ୍କୁ ତୁରନ୍ତ ଗିରଫ କରିବା ଦରକାର । ମୃତ ପରିବାରକୁ ସର୍ବନିମ୍ନ 10 ଲକ୍ଷ ଦେବାକୁ ଦାବି କରିଛି ବିଜେପି '।
କେବଳ ଏତିକି ନୁହେଁ ହସ୍ପିଟାଲରେ ବର୍ଣ୍ଣ ୟୁନିଟ ନାହିଁ । ଏଥିପାଇଁ ୨୦୧୬ ରେ ଦେଢଶହ କୋଟି ଟଙ୍କା ଆସିଥିଲା । ବର୍ଣ୍ଣ ୟୁନିଟ, ଟ୍ରମା କେୟାର ଆଦି କାହିଁକି ହୋଇନି ସ୍ବାସ୍ଥ୍ୟ ବିଭାଗ ଉତ୍ତର ଦେବା ଦରକାର ବୋଲି ବିଜେପି ପ୍ରେସମିଟ କରି ଦାବି କରିଛି। ବିଜୁଳି ବିଭାଗ ଏହି ଘଟଣା ପାଇଁ ସମ୍ପୂର୍ଣ୍ଣ ଦାୟୀ ହେବା ସହ ଯିଏ ବିଜୁଳି ବିଭାଗର ମୁଖ୍ୟ ସେ ତୁରନ୍ତ ଇସ୍ତଫା ଦିଅନ୍ତୁ ଏବଂ ତାଙ୍କୁ ଗିରଫ କରାଯାଉ ବୋଲି ବିଜେପି କହିଛି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
