ଭୁବନେଶ୍ବର: ଜୋର ଧରିବାରେ ଲାଗିଛି ଜାତିଗତ ଜନଗଣନା ରାଜନୀତି । ଜନଗଣନା ସହ ରାଜ୍ୟରେ ଆର୍ଥିକ,ସାମାଜିକ ଓ ଜାତିଗତ ଗଣନା କରିବା ପାଇଁ କେନ୍ଦ୍ର ସରକାରଙ୍କୁ ସୁପାରିଶ ପାଇଁ ରାଜ୍ୟ କ୍ୟାବିନେଟ ନିଷ୍ପତ୍ତି ନେବା ପରେ ଓଡ଼ିଶାରେ ରାଜନୀତି ଜୋର ଧରିଛି । ଜାତିଗତ ଜନଗଣନା କଥା କହୁଥିବା ଓଡ଼ିଶା ସରକାର ଏପର୍ଯ୍ୟନ୍ତ ପଛୁଆବର୍ଗଙ୍କ ଚିହ୍ନଟ ପ୍ରକ୍ରିୟାରେ କାହିଁକି ବିଳମ୍ବ କରିଛନ୍ତି ବୋଲି ପ୍ରଶ୍ନ କରି ସରକାରଙ୍କ ଆନ୍ତରିକତା ଉପରେ ପ୍ରଶ୍ନ ଉଠାଇଛି ବିଜେପି । ଏନେଇ ଏକ ସାମ୍ବାଦିକ ସମ୍ମିଳନୀ କରି ଶାସକ ବିଜେଡିକୁ ଘେରିବାକୁ ଉଦ୍ୟମ କରିଛନ୍ତି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର ।
ରାଜ୍ୟରେ ପଛୁଆବର୍ଗଙ୍କ ଚିହ୍ନଟ ପ୍ରକ୍ରିୟାରେ କାହିଁକି ବିଳମ୍ବ କରିଛନ୍ତି ରାଜ୍ୟ ସରକାର । ଯାହା ପଛୁଆବର୍ଗଙ୍କ ସାମ୍ବିଧାନିକ ଅଧିକାରକୁ ରାଜ୍ୟ ସରକାର ଛିନ୍ନ କରିଥିବା ସେ କହିଛନ୍ତି । ଜାତିଭିତ୍ତିକ ଜନଗଣନା ପ୍ରସଙ୍ଗରେ ବିଜେଡି ରାଜନୀତି କରୁଛି ବୋଲି ଅଭିଯୋଗ କରିଛନ୍ତି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର । ଓଡିଶା ସରକାର ନିଜକୁ ଭାରତର ସମ୍ବିଧାନର ଉର୍ଦ୍ଧ୍ବ ବୋଲି ଭାବୁଛନ୍ତି ବୋଲି ଲେଖାଶ୍ରୀ ସାମନ୍ତସିଂହାର ସାମ୍ବାଦିକ ସମ୍ମିଳନୀରେ କହିଛନ୍ତି ।
ଗତ ୩୦ ବର୍ଷ ପୂର୍ବରୁ ମଣ୍ଡଳ କମିଶନ ପାରିତ ହୋଇଥିଲା । ମାତ୍ର ଦେଶର ସବୁ ରାଜ୍ୟ ଏହାକୁ ସମ୍ମାନ ଦେଇ ଲାଗୁ କରିଥିବାବେଳେ ରାଜ୍ୟ ସରକାର ୩୦ ବର୍ଷ ଭିତରେ ପଛୁଆବର୍ଗ ମାନଙ୍କୁ ସମ୍ବିଧାନର ଅଧିକାର ଦେଲେ ନାହିଁ । ରାଜ୍ୟରେ ପଛୁଆବର୍ଗଙ୍କ ସଂଖ୍ୟା ଢେର ଅଧିକ, ଓଡ଼ିଶାରେ ଗୋପାଳ, ଚଷା, କୁମ୍ଭାର,କୂଳଟା, ଗୋଲା ଭଳି ପଛୁଆବର୍ଗଙ୍କୁ ଅଧିକାର ମିଳିବା କଥା । ସେଠାରେ କିନ୍ତୁ ରାଜ୍ୟ ସରକାର ଜାଣିଶୁଣି ଏହାକୁ ଲାଗୁ କରୁନାହାନ୍ତି ବୋଲି ବିଜେପି ପକ୍ଷରୁ ଅଭିଯୋଗ କରାଯାଇଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
