ଭୁବନେଶ୍ବର: ରାଜ୍ୟର ସର୍ବବୃହତ ଦଳ ଭାବେ ଉଭା ହୋଇଥିବା ବିଜେଡି ଆସନ୍ତା 26 ତାରିଖରେ ପାଳିବ 22ତମ ପ୍ରତିଷ୍ଠା ଦିବସ। ରାଜଧାନୀ ଭୁବନେଶ୍ବରରେ ଥିବା ରାଜ୍ୟ କାର୍ଯ୍ୟାଳୟରେ ବିଜେଡି ପାଳନ କରିବ ତା’ର ପ୍ରତିଷ୍ଠା ଦିବସ। ଏହା ସହ ବଜୁ ଜନତା ଦଳ ରାଜ୍ୟର ସମସ୍ତ ଜିଲ୍ଲା ଓ ନିର୍ବାଚନ ମଣ୍ଡଳୀରେ ମଧ୍ୟ ପ୍ରତିଷ୍ଠା ଦିବସ ପାଳନ କରିବ। ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦଳୀୟ କର୍ମୀ ଓ ନେତାଙ୍କୁ ଚିଠି ଲେଖିଛନ୍ତି।
ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ଦଳର ସକ୍ରିୟ କର୍ମୀଙ୍କ ପାଇଁ ବୀମା ଘୋଷଣା କରିବାର ସମ୍ଭାବନା ରହିଛି। ଏହାସହ ଦଳୀୟ ସଭ୍ୟ ସଂଗ୍ରହ ଗତବର୍ଷ 40 ଲକ୍ଷ ଥିବା ବେଳେ ଚଳିତ ବର୍ଷ ଏହାକୁ 60 ଲକ୍ଷ କରିବା ପାଇଁ ମଧ୍ୟ ଜୋରଦାର ସଭ୍ୟ ସଂଗ୍ରହ ଚାଲିଛି। ଦଳକୁ କ୍ୟାଡର ବେସ୍ ପାର୍ଟି କରି ଆହୁରି ସଶକ୍ତ ଓ ସଂଘଟିତ କରିବା ପାଇଁ ଦଳ ପକ୍ଷରୁ ଜୋରଦାର ପ୍ରୟାସ ଆରମ୍ଭ ହୋଇଛି।
1997 ମସିହା ଡିସେମ୍ବର 26 ତାରିଖରେ ଗଠନ ହୋଇଥିବା ବିଜେଡି, ରାଜ୍ୟରେ ଏପର୍ଯ୍ୟନ୍ତ ଶାସନ ଗାଦିରେ ରହିଆସିଛି। ବିଜୁ ପଟ୍ଟନାୟକଙ୍କ ନାମରେ ଗଠିତ ହୋଇଥିବା ଏହି ଦଳ ଆରମ୍ଭ ହେବା ଦିନ ଠାରୁ ନବୀନଙ୍କ ନେତୃତ୍ବରେ ଗୋଟିଏ ପରେ ଗୋଟିଏ ନିର୍ବାଚନ ବାଜି ଜିତିବାର ଲାଗିଛି। ଦଳର ବିଜୟ ପଛରେ ନବୀନଙ୍କ ନେତୃତ୍ବ ମୁଖ୍ୟ ଭୂମିକା ଗ୍ରହଣ କରିଛି।
ଏହାସହ କଥା କମ କାମ ବେଶୀ, ବିକାଶର ଏଜେଣ୍ଡା ଓ ପ୍ରାକୃତିକ ବିପର୍ଯ୍ୟୟର ଦୃଢ ମୁକାବିଲା ନବୀନଙ୍କ ବଡ ରାଜନୈତିକ ଅସ୍ତ୍ର ରହିଛି। ଯେଉଁଥିପାଇଁ ବିଜେଡି ରାଜ୍ୟରେ ପଞ୍ଚମ ଥର ସରକାର ଗଢ଼ିଛି। ଦଳକୁ ତୃଣମୂଳସ୍ତରରୁ ଶୀର୍ଷରେ ପହଞ୍ଚାଇଥିବା କର୍ମୀଙ୍କ ପାଇଁ ବିଜେଡି ସୁପ୍ରିମୋଙ୍କ ଘୋଷଣା ଉପରେ ଏବେ ସମସ୍ତଙ୍କ ନଜର।
ରାଜ୍ୟରେ ବିଜେଡି ଏବେ ଦୁଇ ପ୍ରକାରର ସଦସ୍ୟତା ଆରମ୍ଭ କରିଛି, ସାଧାରଣ କର୍ମୀ ଓ ସକ୍ରିୟ କର୍ମୀ, ଜଣେ ସାଧାରଣ କର୍ମୀ 25ଜଣଙ୍କୁ ଦଳରେ ସାମିଲ କଲେ ସକ୍ରିୟ କର୍ମୀର ମାନ୍ୟତା ଦିଆଯାଉଛି। ଏହିଭଳି ଭାବରେ ରାଜ୍ୟରେ ଥିବା ଲକ୍ଷ ଲକ୍ଷ ସକ୍ରିୟ କର୍ମୀଙ୍କୁ ବିଜେଡି ବୀମା ଦେବାର ବ୍ୟବସ୍ଥା କରିବାକୁ ଯୋଜନା କରୁଛି। ଏନେଇ ପ୍ରତିଷ୍ଠା ଦିବସରେ ବିଜେଡି ସୁପ୍ରିମୋ ଘୋଷଣା କରିପାରନ୍ତି। ଦଳର କାର୍ଯ୍ୟ, ଜନତାଙ୍କ ପ୍ରତି ଥିବା ଉତ୍ତର ଦାୟିତ୍ଵ, ଓ ସଙ୍ଗଠନକୁ ଆହୁରି ମଜବୁତ କରିବାକୁ ଦଳ ଏବେ ଠାରୁ ଆରମ୍ଭ କରିଛି ପ୍ରସ୍ତୁତି।
ଏଥର ସୂର୍ଯ୍ୟ ପରାଗ ପଡୁଥିବାରୁ ଦଳର ପ୍ରତିଷ୍ଠା ଦିବସ ଅପରାହ୍ନରେ ପାଳନ ହେବ। ଏହା ସହ ଏହି କାର୍ଯ୍ୟକ୍ରମରେ ଦଳର ନେତା ମନ୍ତ୍ରୀ ପୂର୍ବତନ ବିଧାୟକ ଛାମୁଆ ସଙ୍ଗଠନର ସମସ୍ତ ସଦସ୍ୟ ସାମିଲ ହେବେ। ନବୀନ ପ୍ରତିଷ୍ଠା ଦିବସରେ ଦଳୀୟ କର୍ମୀଙ୍କୁ କ’ଣ ମନ୍ତ୍ର ଦେବେ ଏବଂ ବିରୋଧୀଙ୍କୁ କଣ ଚ୍ୟାଲେଞ୍ଜ, ତାହା ଉପରେ ରହିଛି ସମସ୍ତଙ୍କ ନଜର।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
