ଭୁବନେଶ୍ବର: ପରୀ ହତ୍ୟା ମାମଲାକୁ ନେଇ ରାଜନୀତି ସରଗରମ । ଉଠୁଛି ପଡୁଛି ଗୃହ । ଗୃହରେ ପ୍ରବଳ ହଟ୍ଟଗୋଳ ପରେ ଏସଆଇଟି ତଦନ୍ତ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ହେଲେ ସାରା ରାଜ୍ୟରେ ଆଲୋଡନ ସୃଷ୍ଟି କରିଥିବା ପରୀ ହତ୍ୟା ଘଟଣାକୁ ଛୋଟିଆ ଘଟଣା ବୋଲି କହିଛନ୍ତି ବିଜେଡି ବିଧାୟକ ସୌମ୍ୟରଞ୍ଜନ ପଟ୍ଟନାୟକ। ଯାହାକୁ ନେଇ ରାଜନୀତି ତେଜିବାରେ ଲାଗିଲାଣି ।
ସୌମ୍ୟ ରଞ୍ଜନ ପ୍ରତିକ୍ରିୟା ରଖି କହିଛନ୍ତି, ‘ମନ୍ତ୍ରୀଙ୍କ ସମୃକ୍ତି ଅଛି ବୋଲି କେମିତି ଜାଣିବା। ଏହା ଗୋଟିଏ ଛୋଟିଆ ଅଘଟଣ ପରବର୍ତ୍ତୀ ସମୟରେ ପୋଲିସ ହତ୍ୟା ବୋଲି କହିଛି । ସେଥିରେ କାହାର ସମ୍ପୃକ୍ତି ଅଛି କି ନ ଅଛି । ତଦନ୍ତ କଲେ ଜଣାପଡିବ । ଏସଆଇଟି ତଦନ୍ତ ନିର୍ଦ୍ଦେଶ ପରେ ଗୃହକୁ ଅଚଳ କରିବାର କୌଣସି କାରଣ ନାହିଁ । ବିରୋଧୀ ଦଳର ଦାବିକୁ ଗ୍ରହଣ କରିଛନ୍ତି ସରକାର । ମୁଖ୍ୟମନ୍ତ୍ରୀ ହସ୍ତକ୍ଷେପ କରି ଏସଆଇଟି ତଦନ୍ତ ନିର୍ଦ୍ଦେଶ ଦେଇଛନ୍ତି । ବିରୋଧୀ କଂଗ୍ରେସ ଏସଆଇଟି ତଦନ୍ତ ଦାବି କରୁଥିଲେ। ସରକାର ବିରୋଧୀ ଦଳକୁ ସମ୍ମାନ ଜଣାଇ ଏସଆଇଟି ତଦନ୍ତ ହୋଇଛି । ’
ହେଲେ ଏଠାରେ ପ୍ରଶ୍ନ ଉଠୁଛି । ପରୀ ହତ୍ୟା ଘଟଣାକୁ ନେଇ ସାରା ରାଜ୍ୟରେ ବିକ୍ଷୋଭ ଆନ୍ଦୋଳନ ହେଉଛି । ଏହାସହ ଗୃହ ମଧ୍ୟ ଦୁଇଦିନ ହେବ ଅଚଳ । ଏହାକୁ ବିଜେଡି ବିଧାୟକ ଏକ ସାମାନ୍ୟ ଅଘଟଣ କହିବା କେତେଦୂର ଯୁକ୍ତି ଯୁକ୍ତ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
