ଭୁବନେଶ୍ୱର: ଆରମ୍ଭ ହୋଇଛି ପୌର ବ୍ୟାଟେଲ । ଚାଲିଛି ନାମାଙ୍କନ ପ୍ରକ୍ରିୟା । ହେଲେ ଭୁବନେଶ୍ୱର ମହାନଗର ନିଗମ ପାଇଁ ପ୍ରାର୍ଥୀ ଚୟନ ବିଜେଡି ସମ୍ମୁଖରେ ଚ୍ୟାଲେଞ୍ଜ ସୃଷ୍ଟି କରିଛି । ପଞ୍ଚାୟତ ନିର୍ବାଚନ ଫଳାଫଳ ଆଶାୟୀଙ୍କୁ ବିଜେଡି ମୁହାଁ କରିଛି । ଯଦି ସମୀକରଣ ଓ ସମନ୍ୱୟ ସଠିକ ନରୁହେ, ତେବେ ଦଳ ଲାଗି ସମସ୍ୟା ହେବ । ଫଳରେ ଦଳକୁ ଏବେଠୁ ଘାରିଲାଣି ଅସନ୍ତୁଷ୍ଟଙ୍କ ଭୟ । ବ୍ରାଣ୍ଡ ବିଜେଡି ବିଜୟର ଟ୍ରମ୍ପକାର୍ଡ ବୋଲି ଆଶାୟୀ ଅନୁଭବ କରୁଛନ୍ତି । ଫଳରେ ଭୁବନେଶ୍ୱରର ୩ ବିଧାୟକ ଓ ବରିଷ୍ଠ ନେତାଙ୍କ ଘର ଆଗରେ ଲାଗୁଛି ଆଶାୟୀଙ୍କ ଭିଡ଼ । ସକାଳୁ ସଞ୍ଜ ନେତାଙ୍କ ଘର ଆଗରେ ଡେରା ପକାଉଛନ୍ତି ଆଶାୟୀ ଏବଂ ତାଙ୍କ ସମ୍ପର୍କୀୟ ।
Municipal Election: ବିଜେଡିକୁ ଘାରିଲାଣି ଅସନ୍ତୁଷ୍ଟଙ୍କ ଭୟ ! ବିଜେଡିକୁ ଏବେଠୁ ଘାରିଲାଣି ଅସନ୍ତୁଷ୍ଟଙ୍କ ଭୟ । ପ୍ରତ୍ୟେକ ୱାର୍ଡରୁ ଏକାଧିକ ପ୍ରାର୍ଥୀଙ୍କ ନାଁ ସାମ୍ନାକୁ ଆସୁଛି । ପୂର୍ବତନ କର୍ପୋରେଟର, ତାଙ୍କ ସମ୍ପର୍କୀୟ ଓ ନୂଆ ଚେହେରାଙ୍କ ବାୟୋଡାଟା ଦଳୀୟ ନେତାଙ୍କ ନିକଟରେ ଗଦା ହେବାରେ ଲାଗିଛି । କିଏ ପୁରୁଣା ସମ୍ପର୍କ, ଦଳୀୟ ଭାବନା, ବିକାଶର ମୁଦ୍ଦା ଓ ଆନୁଗତ୍ୟ ଆଧାରରେ ନିଜକୁ ପ୍ରାର୍ଥୀ କରିବା ଲାଗି ଦାବି ମଧ୍ୟ କରୁଛନ୍ତି । ଫଳରେ ପ୍ରାର୍ଥୀ ଚୟନ ନେତାଙ୍କ ଲାଗି କାଠିକର ପାଠ ହୋଇଛି ।ଗତ ପୌର ନିର୍ବାଚନରେ ୧୦ରୁ ଅଧିକ ପୂର୍ବତନ କର୍ପୋରେଟର ଦଳୀୟ ଟିକେଟ ନମିଳିବାରୁ କ୍ଷଭୋ ପ୍ରକାଶ କରି ଦଳ ଛାଡିଥିଲେ । ସ୍ଵାଧୀନ ପ୍ରାର୍ଥୀ ହୋଇ ନିର୍ବାଚନ ମଧ୍ୟ ଜିତିଥିଲେ । ପରବର୍ତ୍ତୀ ସମୟରେ ଦଳ ସେମାନଙ୍କ ମାନଭଞ୍ଜନ କରି ଦଳକୁ ଫେରାଇ ଆଣିଥିଲା । ଗତ ନିର୍ବାଚନ ଅପେକ୍ଷା ଚଳିତ ପୌର ନିର୍ବାଚନରେ ଆଶାୟୀଙ୍କ ସଂଖ୍ୟା ଅଧିକ । ତେଣୁ ଅସନ୍ତୁଷ୍ଟଙ୍କ ସଂଖ୍ୟା ବଢିବା ସ୍ୱାଭାବିକ କଥା । ଏହାସହ ଚଳିତ ପୌର ନିର୍ବାଚନ ପାଇଁ ୱାର୍ଡ ସଂରକ୍ଷଣ କରାଯାଇଛି । ଅନେକ ପୁରୁଖା ଓ ହେଭିୱେଟ ପୂର୍ବତନ କର୍ପୋରେଟର ଆଶାୟୀଙ୍କ ସ୍ବପ୍ନ ଭାଙ୍ଗିଛି । ପତ୍ନୀ ଓ ସମ୍ପର୍କୀୟଙ୍କ ଜରିଆରେ ସ୍ବପ୍ନ ପୂରଣ କରିବା ପାଇଁ ଲବି ଜୋରଦାର କରିଛନ୍ତି ପୂର୍ବତନ କର୍ପୋରେଟର । ଯଦି ବିଫଳ ହୁଅନ୍ତି, ତେବେ ସେମାନେ ସ୍ୱାଧୀନ ଭାବରେ ଲଢ଼ିବା ପାଇଁ ଦାବି ଉପସ୍ଥାପନ କରିବେ । ଫଳରେ ବିଜେଡି ପାଇଁ ଚିନ୍ତା ନିଶ୍ଚୟ ବଢିବ । ମିଳିଥିବା ସୂଚନା ଅନୁଯାୟୀ ଆସନ୍ତା ଦୁଇ ଦିନ ମଧ୍ୟରେ ପ୍ରାର୍ଥୀ ତାଲିକା ପ୍ରକାଶ କରିବ ଦଳ । ପ୍ରାର୍ଥୀ ତାଲିକା ପ୍ରକାଶ ପାଇବା ପରେ ଅସନ୍ତୁଷ୍ଟଙ୍କୁ ମନେଇବା ପାଇଁ ଦଳ କଣ ବାଟ ଆପଣେଇବ ତାହା ଉପରେ ସମସ୍ତଙ୍କର ନଜର ।
ଭୁବନେଶ୍ୱରରୁ ଭବାନୀ ଶଙ୍କର ଦାସ ଓ ସଞ୍ଜୀବ ରାୟ, ଇଟିଭି ଭାରତ 
