ଭୁବନେଶ୍ବର: ଆଜି(ଶନିବାର) ରାଜ୍ୟରେ ଚାଲିଛି ପୌର ନିର୍ବାଚନ ପାଇଁ ଭୋଟ ଗଣତି ପ୍ରକ୍ରିୟା । କିଛି ପ୍ରାର୍ଥୀଙ୍କ ଭାଗ୍ୟ ଫିଟିଥିବା ବେଳେ ଆଉ କିଛି ପ୍ରାର୍ଥୀ ଫଳାଫଳକୁ ଚାହିଁ ବସିଛନ୍ତି । ଏପଟେ ଗଣତି କେନ୍ଦ୍ରରେ ଆଇନ ଶୃଙ୍ଖଳା ପରିସ୍ଥିତି ନ ଉପୁଜିବା ପାଇଁ ପଇଁତରା ମାରୁଛି ପ୍ରଶାସନ । ବିଜେବି କଲେଜ ଗଣତି କେନ୍ଦ୍ରରେ ସୁରକ୍ଷା ବ୍ୟବସ୍ଥାକୁ ସମୀକ୍ଷା କରିଛନ୍ତି ଭୁବନେଶ୍ବର ଡିସିପି ଉମାଶଙ୍କର ଦାଶ । ସମସ୍ତ ଗଣତି ବିଲ୍ଡିଂକୁ ସୁରକ୍ଷା ବଳୟ ମଧ୍ୟରେ ରଖାଯାଇଛି ବୋଲି ସେ କହିଛନ୍ତି ।
ସୁରୁଖୁରୁରେ ଭୋଟ ଗଣତି ପ୍ରକ୍ରିୟା ଜାରି ରହିବା ପାଇଁ ପୋଲିସ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି । ଗଣତି ବିଲଡିଂକୁ ପୋଲିସ ସୁରକ୍ଷା ବଳୟରେ ରଖାଯାଇଛି। ପ୍ରାୟ ୨୦ ପ୍ଲାଟୁନ ପୋଲିସ ଫୋର୍ସ ସହ ୭ ଜଣ ଅତିରିକ୍ତ ଡିସିପି ପାହ୍ୟାର ଅଧିକାରୀ ମୁତୟନ ଥିବା ସେ କହିଛନ୍ତି। ଏହାସହ ବିଜୟ ପରେ କୋୖଣସିପାର୍ଟି ସେଲିବ୍ରେସନ ପାଇଁ ଅନୁମତି ମାଗି ନାହାଁନ୍ତି ତେଣୁ ବିନା ଅନୁମତିରେ ସେଲିବ୍ରେସନ କଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ଡିସିପି କହିଛନ୍ତି ।
ତେବେ ସୂଚନା ଥାଉ କି ଶନିବାର ସକାଳ ୮ଟାରୁ ଆରମ୍ଭ ହୋଇଛି ଭୋଟ ଗଣତି ପ୍ରକ୍ରିୟା । ପ୍ରଥମେ ପୋଷ୍ଟାଲ ବାଲାଟ ଗଣତି ପରେ ଇଭିଏମ ଭୋଟ ଗଣତି ହେବାର ବ୍ୟବସ୍ଥା ହୋଇଛି । ତେବେ ବିଜେବି କଲେଜ ଷ୍ଟ୍ରଙ୍ଗରୁମରେ 1 ଘଣ୍ଟା ବିଳମ୍ବରେ ଆରମ୍ଭ ହୋଇଥିଲା ଭୋଟ ଗଣତି । ଏଠାରେ କୋଭିଡ ସ୍ଥିତି ଯୋଗୁଁ ଷ୍ଟ୍ରଙ୍ଗରୁମ ବିଶୋଧନ କରାଯିବା ପରେ ଗଣତି ପ୍ରକ୍ରିୟା ଆରମ୍ଭ ହୋଇଥିଲା ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
