ଭୁବନେଶ୍ବର : ରାଜଧାନୀ ଉପକଣ୍ଠରେ ହତ୍ୟା ଉଦ୍ୟମର ଅଭାବନୀୟ ଦୃଶ୍ୟ । ଡ୍ରେନରେ ବୁଡାଇ ବୁଡାଇ ପକ୍ଷାଘାତ ରୋଗୀକୁ ହତ୍ୟା ଉଦ୍ୟମ । ଚନ୍ଦକା ଥାନା ଦାରୁଠେଙ୍ଗ ଗାଁରେ ଦେଖିବାକୁ ମିଳିଛି ଅମାନବୀୟ କାଣ୍ଡ । ଜଣେ ବ୍ୟକ୍ତି ନିଜର ଜମିଜମା ଶତୃତାକୁ ନେଇ ଆଉ ଏକ ବ୍ୟକ୍ତିକୁ ଡ୍ରେନରେ ବୁଡାଇ ବୁଡାଇ ହତ୍ୟା ଉଦ୍ୟମ କରୁଥିବା ଭିଡିଓ ସାମ୍ନାକୁ ଆସିଛି । ଗତ ୨୯ ତାରିଖରେ ଏହି ଭିଡିଓ ଭାଇରାଲ ହୋଇଛି ।
ସୂଚନା ମୁତାବକ ପୋଲିସ ଦୁଇଜଣଙ୍କୁ ଅଟକ ରଖି ପଚରାଉଚରା କରୁଛି । ଚନ୍ଦକା ଦାରୁଠେଙ୍ଗ ଗ୍ରାମର ବୁଲୁ ବେହେରା ଓ ରବିନ୍ଦ୍ର ବେହେରାଙ୍କ ପରିବାର ମଧ୍ୟରେ ଜମିଜମାକୁ ନେଇ ବିବାଦ ଲାଗି ରହିଥିଲା। । ତେବେ ପକ୍ଷାଘାତରେ ଆକ୍ରାନ୍ତ ରବିନ୍ଦ୍ର ବେହେରା ସବୁଦିନ ପରି ଗତକାଲି ଯାଉଥିବା ସମୟରେ ବୁଲୁ ଓ ତାଙ୍କ ସହଯୋଗୀ ମିଶି ପାଟିତୁଣ୍ଡ କରିଥିଲେ ।
ପରେ ବୁଲୁ ତାଙ୍କୁ ମାରିବାରୁ ସେ ତାଙ୍କ ହାତକୁ କାମୁଡି ଦେଇଥିଲେ । ଏଥିରେ ଉତକ୍ଷିପ୍ତ ହୋଇ ବୁଲୁ ରବିନ୍ଦ୍ରଙ୍କୁ ମାଡ ମାରିବା ସହ ନିକଟରେ ଥିବା ଡ୍ରେନରେ ବୁଡାଇ ହତ୍ୟା ଉଦ୍ୟମ କରିଥିଲେ । ସେ ଯେତେ ଚିତ୍କାର କଲେ ମଧ୍ୟ ବୁଲୁ ଛାଡିନଥିଲେ । ଲୋକେ ଦଉଡି ଆସିବାରୁ ରବିନ୍ଦ୍ର ଅଳ୍ପକେ ବର୍ତ୍ତି ଯାଇଥିଲେ । ଏନେଇ ଉଭୟଙ୍କ ପକ୍ଷରୁ ଥାନାରେ ଅଭିଯୋଗ ହୋଇଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
