ଭୁବନେଶ୍ବର: ପ୍ରେମ ନାଁରେ ଯୁବତୀ ଚାଲାଣ । ପ୍ରଥମେ ପ୍ରେମ ଜାଲରେ ଫସାଇବା ପରେ ଯୁବତୀଙ୍କୁ ଚାଲାଣ କରୁଛନ୍ତି ଗଞ୍ଜାମ ରମ୍ଭା ଅଞ୍ଚଳର ସମୀର ଚନ୍ଦ୍ର ବେଜ୍ ।ଏଭଳି ଅଭିଯୋଗ ଆଣିଛନ୍ତି ରମ୍ଭା ଅଞ୍ଚଳର ଦୁଷ୍ମନ୍ତ ବେଜ । ତାଙ୍କ ଭଉଣୀଙ୍କୁ ଗଞ୍ଜାମ ରମ୍ଭା ଅଞ୍ଚଳର ସମୀର ଚନ୍ଦ୍ର ବେଜ ପ୍ରେମ ଜାଲରେ ଫସାଇବା ପରେ ଅପହରଣ କରିବା ସହ ତାର ଅଶ୍ଳୀଳ ଭିଡିଓ କରିଥିଲା । ଏବେ କୁଆଡେ ଯୁବତୀଙ୍କୁ ବିକ୍ରି କରିଥିବା ସେ ରମ୍ଭା ଥାନାରେ ଅଭିଯୋଗ କରିଥିଲେ ।
ଉକ୍ତ ଯୁବକଙ୍କୁ ରାଜଧାନୀର ସୁନ୍ଦରପଦାର ହାଇଟେକ ପ୍ଲାଜାରୁ ଜଣେ ଯୁବତୀଙ୍କ ସହ ଥିବା ସମୟରେ ଧରିଛନ୍ତି ତାଙ୍କର ପତ୍ନୀ । ଯୁବକ ଜଣଙ୍କ ବିବାହିତ ହୋଇଥିବା ବେଳେ ଅନେକ ଯୁବତୀଙ୍କୁ ପ୍ରେମ ଜାଲରେ ଫସାଇଥିବା ପତ୍ନୀ ଅଭିଯୋଗ କରିଛନ୍ତି । ପ୍ରଥମ ପତ୍ନୀ ରୋଜାଲିନ ବେଜଙ୍କ ଅଭିଯୋଗ ଅନୁଯାୟୀ, ସେ ମାଟ୍ରିମୋଲିଆଲ ସାଇଟରେ ଏମ ଟେକ ଇଞ୍ଜିନିୟର ପରିଚୟ ଦେଇ ବିବାହ କରିଥିଲେ । କିନ୍ତୁ ଏବେ ଧରା ଛୁଆଁ ନ ଦେଇ କୁଆଡେ ବୁଲୁଛନ୍ତି । ମାଟ୍ରିମୋନିଆଲ ସାଇଟରେ ଭିନ୍ନ ଭିନ୍ନ ପରିଚୟ ଦେଇ ସେ ଏପରି ଏକାଧିକ ଯୁବତୀଙ୍କୁ ଫସାଇଥିବା ପତ୍ନୀ ଅଭିଯୋଗ କରିଛନ୍ତି କଟକ ସଦର ଥାନାରେ ।
ଉକ୍ତ ଯୁବକଙ୍କ ବିରୋଧରେ ଏଭଳି ଅନେକ ଅଭିଯୋଗ ହୋଇଥିବା ବେଳେ ଏନେଇ ପୋଲିସ ଯୁବକଙ୍କୁ ଅଟକ ରଖି ପଚରାଉଚରା କରୁଛି । ସେପଟେ ସମ୍ପୃକ୍ତ ଯୁବକ ଜଣଙ୍କୁ ମିଡିଆରେ ପ୍ରତିକ୍ରିୟା ଦେବାକୁ ଏଡାଇଛନ୍ତି । ତେବେ ବିଭିନ୍ନ ଥାନାର ପୋଲିସ ଅଭିଯୋଗକାରୀଙ୍କ ଅଭିଯୋଗ ଆଧାରରେ ତଦନ୍ତ ଚଳାଇଛି । ଏନେଇ ପୋଲିସ ପକ୍ଷରୁ ପ୍ରତିକ୍ରିୟା ମିଳିପାରିନାହିଁ ।
