ଭୁବନେଶ୍ବର: ଗୋଡେଇ ଗୋଡେଇ ହାଣିଲେ ଦୁର୍ବୃତ୍ତ । ଘରେ ପଶି ରଚିଲେ ଆତଙ୍କରାଜ । ଆଇନକୁ ଖାତିର ନକରି ପୋଲିସକୁ ଭୟ ନକରି ସର୍ବସାଧାରଣରେ ରଚିଲେ ଆତଙ୍କର ଲୋମହର୍ଷଣକାରୀ ଚିତ୍ର । ଯାହାର ପ୍ରତିଫଳ ସ୍ବରୂପ ମଞ୍ଚେଶ୍ବରରେ ଘଟିଛି ଆକ୍ରମଣ ଭଳି ଅଭାବନୀୟ ଘଟଣା । ଜଣେ ଯୁବକଙ୍କ ଘରେ ପଶି ଆକ୍ରମଣ କରିଛନ୍ତି ଆକ୍ରମଣକାରୀ । ପଲସରରେ ଆସି ଅତି ନିର୍ମମ ଭାବେ ଖଣ୍ଡାରେ ହାଣିଲା ଦୁର୍ବୃତ୍ତ ।
ଚକେଇଶିଆଣି କ୍ଲବ ପାଖରେ ଏପରି ଘଟଣା ଦେଖିବାକୁ ମିଳିଛି । ଆକ୍ରମଣରେ ଶିକାର ହୋଇଛନ୍ତି ବିଶ୍ବଜିତ ସୁତାର ଓରଫ ରିଙ୍କୁ ନାମକ ଯୁବକ । ଆକ୍ରମଣ ପରେ ରିଙ୍କୁଙ୍କ ସହଯୋଗୀ ମୁକେଶ ସାହୁ ତାଙ୍କୁ ଗୁରୁତର ଅବସ୍ଥାରେ ହସପିଟାଲ ନେଇଥିଲେ । ଏନେଇ ମଞ୍ଚେଶ୍ବର ଥାନାରେ ଅଭିଯୋଗ କରିଛନ୍ତି ସହଯୋଗୀ ମୁକେଶ ସାହୁ ।
ଗୁରୁତର ଆହତ ବ୍ୟକ୍ତି ଏକ ଘରୋଇ ମେଡିକାଲରେ ଚିକିତ୍ସିତ ହେଉଛନ୍ତି । ତେବେ ଆଇନକୁ ହାତକୁ ନେଇ ଏପରି ଆକ୍ରମଣ ଘଟଣା ପୁର୍ବରୁ ଅନେକ ବାର ରାଜଧାନୀରେ ଦେଖିବାକୁ ମିଳିଛି । ହେଲେ ଏନେଇ କୌଣସି ଷ୍ଟ୍ରାଟେଜି ଆପଣାଉନାହିଁ କମିଶନରେଟ ପୋଲିସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
