ଭୁବନେଶ୍ବର: ରାଜଧାନୀ ରାସ୍ତାକଡରେ ପଡିଛି ଟଙ୍କା ବଣ୍ଡଲ । ଭୁବନେଶ୍ବର କ୍ୟାପିଟାଲ ଥାନା ଅଞ୍ଚଳର ଗଙ୍ଗନଗର ଛକରୁ ମଙ୍ଗଳବାର ମିଳିଛି 3ଟି 500 ଟଙ୍କିଆ ବଣ୍ଡଲ । ହଠାତ ରାସ୍ତା କଡରେ ଏହି ଟଙ୍କା ଦେଖି ଲୋକ ସନ୍ଦେହ କରିଥିଲେ ଓ ପୋଲିସକୁ ଖବର ଦେଇଥିଲେ । କ୍ୟାପିଟାଲ ଥାନା ପୋଲିସ ସମସ୍ତ ଟଙ୍କା ଥାନାକୁ ନେଇ ତାହାର ତଦନ୍ତ ଆରମ୍ଭ କରିଛି । ତେବେ ସମସ୍ତ ଟଙ୍କା ଅସଲି ବୋଲି ଜଣାପଡିଛି ।
ଟଙ୍କା ସବୁ କାହାର, କେଉଁଠୁ ଆସିଛି ଓ ସେଠାକୁ କିପରି ଆସିଲା ଏନେଇ କୌଣସି ସୂଚନା ମିଳିନାହିଁ । ନା କୌଣସି ବେଆଇନ କାରବାର ଟଙ୍କା ଯୋଗୁଁ କେହି ସାମ୍ନାକୁ ଆସୁନାହାନ୍ତି, ତାହା ମଧ୍ୟ ଜଣାପଡିନି । ପୋଲିସ ଉପସ୍ଥିତିରେ ଟଙ୍କା ଗଣା ଚାଲିଛି । ଘଟଣାରେ ସିସିଟିଭି ଫୁଟେଜ ଯାଞ୍ଚ ହେଉଛି । ଉପଯୁକ୍ତ ପ୍ରମାଣ ଦେବା ପରେ ଥାନାରୁ ଟଙ୍କା ହସ୍ତାନ୍ତର କରାଯିବ ବୋଲି ଥାନା ଆଇଆଇସି ଗଣମାଧ୍ୟମକୁ ସୂଚନା ଦେଇଛନ୍ତି ।
ଅନ୍ୟପଟେ ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ଟଙ୍କା ମିଳିବାର କିଛି ସମୟ ପୂର୍ବରୁ ଏକ ବାଇକଟି ଦୁର୍ଘଟଣା ଗସ୍ତ ହୋଇଥିଲା । ଉକ୍ତ ବାଇକ ଆରୋହୀଙ୍କ ଟଙ୍କା ରାସ୍ତାରେ ପଡ଼ିଥାଇ ପାରେ ବୋଲି ସନ୍ଦେହ କରାଯାଉଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
