ଭୁବନେଶ୍ବର: ଭାରତର ପ୍ରସିଦ୍ଧ ଫ୍ୟାସନ ଓ ଲାଇଫ ଷ୍ଟାଇଲ ଇଭେଣ୍ଟ ଲାକମେ ଫ୍ୟାସନ ୱିକରେ ପ୍ରଦର୍ଶନ କରିବା ନିମନ୍ତେ ଏକ ଚୟନ ପ୍ରକ୍ରିୟା ଭୁବନେଶ୍ବରର ଏକ ହୋଟେଲରେ ଅନୁଷ୍ଠିତ ହୋଇଯାଇଛି । ଯେଉଁଥିରେ ଆଇଏନଆଇ ଏଫଡି ଶିକ୍ଷାଅନୁଷ୍ଠାନର ପୂର୍ବାଞ୍ଚଳ ଶାଖାର ଫ୍ୟାସନ ଓ ଇଣ୍ଟେରିୟର ଡିଜାଇନର ଛାତ୍ରଛାତ୍ରୀମାନେ ଅଂଶଗ୍ରହଣ କରି ସେମାନଙ୍କ ପ୍ରତିଭାର ପ୍ରଦର୍ଶନ କରିଛନ୍ତି । ଯେଉଁଥିରୁ 3 ଜଣ ଲେଖାଏଁ 6 ଜଣଙ୍କୁ ବିଚାରକ ମଣ୍ଡଳୀ ପରବର୍ତ୍ତୀ ପର୍ଯ୍ୟାୟକୁ ଯିବାକୁ ନିର୍ବାଚିତ କରିଛନ୍ତି ।
ସେହି ବିଜୟୀ ଛାତ୍ରଛାତ୍ରୀମାନଙ୍କ ମଧ୍ୟରୁ ଓଡ଼ିଶାର ସୌଭାଗ୍ୟ ଲକ୍ଷ୍ମୀ ରାଉତ ଇଣ୍ଟରିୟର ଡିଜାଇନ କ୍ଷେତ୍ରରେ ବିଜୟୀ ହୋଇଥିବା ବେଳେ ପ୍ରଥମ ରନର୍ସ ଅପ ଭାବେ ଏମଡି ଗୁଲସନ ଓ ଦ୍ଵିତୀୟ ରନର୍ସ ଅପ ଭାବେ ଜଗଜିତ କୌର ମନୋନୀତ ହୋଇଛନ୍ତି । ସେହିପରି ଫ୍ୟାସନ ଡିଜାଇନ କ୍ଷେତ୍ରରେ ବାଂଲାଦେଶର ସାଦିଆ ରୂପା ମନୋନୀତ ହୋଇଥିବାବେଳେ ପ୍ରଥମ ରନର୍ସ ଅପ ଭାବେ ସିଫା ସୟଦ ଓ ଦ୍ଵିତୀୟ ରନର୍ସ ଅପ ଭାବେ ମହିମା ମେହେରୋଟ୍ରା ମନୋନୀତ ହୋଇଛନ୍ତି ।
ଆସନ୍ତା ଫେବୃୟାରୀ ମାସରେ ଅନୁଷ୍ଠିତ ହେବାକୁ ଥିବା ଫ୍ୟାସନ ୱିକରେ ଛାତ୍ରଛାତ୍ରୀ ନିଜର ଡିଜାଇନ ପ୍ରଦର୍ଶନ କରିବେ ବୋଲି ଏହି କାର୍ଯ୍ୟକ୍ରମର ଆୟୋଜକ ଆଶୁତୋଷ ପଣ୍ଡା ପ୍ରକାଶ କରିଛନ୍ତି । ଏହି କାର୍ଯ୍ୟକ୍ରମରେ ଜଜ ଭାବେ ଅଂଶଗ୍ରହଣ କରିଥିବା ବଲିଉଡ ଅଭିନେତ୍ରୀ ସୋନାଲି ସେହଗଲ ଏଠାକାର ପିଲାଙ୍କ ନିକଟରେ ଥିବା ପ୍ରତିଭାକୁ ପ୍ରଶଂସା କରିବା ସହିତ ଏମାନେ ଆହୁରି ଆଗକୁ ଯିବେ ବୋଲି କହିଛନ୍ତି । ସେହିପରି ବିଜୟୀ ଲାଭ କରିଥିବା ପ୍ରତିଯୋଗୀମାନେ ସେମାନଙ୍କ ଖୁସି ବ୍ୟକ୍ତ କରିବା ସହ ଆଗାମୀ ପ୍ରଦର୍ଶନ ପାଇଁ ଆହୁରି ଭଲ ପ୍ରସ୍ତୁତି କରିବେ ବୋଲି କହିଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
