ବ୍ରହ୍ମପୁର: ପଲିଥିନ ପାଇଁ ଚଢାଉ କରିବାକୁ ଯାଇ ଜନତାଙ୍କ ଆକ୍ରୋଶର ଶିକାର ହୋଇଛନ୍ତି ଏନଏସି କର୍ମଚାରୀ । ଘଟଣାଟି ହେଉଛି ଗଞ୍ଜାମ ସହରର । ରାଜ୍ୟ ସରକାର ପଲିଥିନ ବ୍ୟବହାର ଉପରେ କଟକଣା ଜାରି କରିବା ସହ ଏହାକୁ ସମ୍ପୂର୍ଣ୍ଣ ବନ୍ଦ କରିବା ଦିଗରେ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ । ଏଥିପାଇଁ ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ବାରମ୍ବାର ଚଢାଉ କରି କାର୍ଯ୍ୟାନୁଷ୍ଠାନ ପାଇଁ କୁହାଯାଇଥିଲା ।
ଏଭଳି ସ୍ଥଳେ ଗଞ୍ଜାମ ଏନଏସିର କାର୍ଯ୍ୟନିର୍ବାହୀ ଅଧିକାରୀଙ୍କ ସହ କର୍ମଚାରୀମାନେ ସହରର ଏକ ମିଠା ଦୋକାନରେ ପଲିଥିନ ରହିଥିବା ନେଇ ଚଢାଉ କରୁଥିବା ସମୟରେ ଉତ୍ତେଜନା ଦେଖିବାକୁ ମିଳିଥିଲା । କର୍ମଚାରୀମାନେ ନିଜର ଟାର୍ଗେଟ ପୂରଣ କରିବା ପାଇଁ ଗୋଟିଏ ଦୋକାନ ଉପରେ ବାରମ୍ବାର ଚଢାଉ କରୁଥିବା ନେଇ ଲୋକେ ଅଭିଯୋଗ କରିଥିଲେ । ହେଲେ ମଦ ଦୋକାନ ଗୁଡିକରେ ଅବାଧରେ ପାଉଚ୍ ବ୍ୟବହାର ହେଉଥିଲେ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଉନଥିବା ନେଇ ପ୍ରଶ୍ନ ଉଠାଇଥିଲେ ସ୍ଥାନୀୟ ବ୍ୟବସାୟୀଙ୍କଠାରୁ ଆରମ୍ଭ କରି ସ୍ଥାନୀୟ ବାସିନ୍ଦା ।
ଏପରିକି କୌଣସି ନିୟମ କାର୍ଯ୍ୟକାରୀ କରିବା ପୂର୍ବରୁ ବ୍ୟବସାୟୀଙ୍କ ସହ ଆଲୋଚନା କରାଯିବା ସହ ବିକଳ୍ପ ବ୍ୟବସ୍ଥା କରାଯାଇ ଚଢାଉ କରାଯିବାକୁ କହିବାରୁ କର୍ମଚାରୀ ହଟହଟା ହୋଇ ଫେରିଥିବା ଦେଖାଯାଇଥିଲା ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
