ବ୍ରହ୍ମପୁର: ପୁଣି ଟିକଟକ୍ ନେଲା ଜୀବନ। ଜାତୀୟ ରାଜପଥରେ ବାଇକ ଚଳାଇ ଟିକଟକ୍ ଭିଡିଓ କରୁଥିବା ବେଳେ ଟ୍ରକ ଧକ୍କାରେ ଜଣଙ୍କ ମୃତ୍ୟୁ ଘଟିଛି। ଅନ୍ୟ ଜଣେ ଗୁରୁତର ଆହତ ହୋଇଥିବା ଜଣାପଡିଛି। ଏଭଳି ଘଟଣା ଘଟିଛି ଗଞ୍ଜାମ ଜିଲ୍ଲାର ଗୋଳନ୍ଥରା ଥାନା ଅଞ୍ଚଳରେ।
ମାଆ ତାରାତାରିଣୀଙ୍କୁ ଦର୍ଶନ କରିବାକୁ ଯାଇଥିବା ଶିବ ଶଙ୍କର ସାହୁ ଓ ତାଙ୍କ ଶାଳକ ଶିବ ପାତ୍ର ମନ୍ଦିର ଦର୍ଶନ କରି ଫେରିବା ରାସ୍ତାରେ ଟିକଟିକ୍ ଭିଡିଓ କରିବା ସହ ଏହାକୁ ଅପଲୋଡ କରୁଥିଲେ। ବ୍ରହ୍ମପୁର ସହରର ନିକଟବର୍ତ୍ତୀ ଖଜୁରିଆ ବ୍ରିଜ ନିକଟରେ ଉଭୟ ଶାଳକ ଓ ଭିଣୋଇ ଗାଡ଼ି ଚଳାଇ ସେଲ୍ଫି ନେଉଥିଲେ।
ଏହି ସମୟରେ ଏକ ଦ୍ରୁତଗାମୀ ଟ୍ରକ୍ ଆସି ସେମାନଙ୍କୁ ଧକ୍କା ଦେଇ ଚାଲି ଯାଇଥିଲା। ଫଳରେ ଉଭୟେ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ବ୍ରହ୍ମପୁର ଏମକେସିଜି ମେଡିକାଲରେ ଭର୍ତ୍ତି କରିଥିଲେ। ଡାକ୍ତର ସେଠାରେ ଭିଣୋଇ ଶିବଶଙ୍କରଙ୍କୁ ମୃତ ଘୋଷଣା କରିଥିବା ବେଳେ ଶାଳକ ଶିବ ପାତ୍ରଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ରହିଛି।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
