ବ୍ରହ୍ମପୁର: ଗଞ୍ଜାମ ଜିଲ୍ଲାରେ ‘ମୋ ଗେହ୍ଲା ଝିଅ’ ଠାରୁ ଆରମ୍ଭ କରି ‘ନିର୍ଭୟା କଢି ’,‘ମୋ ସଚେତନ’ ଏବଂ ‘ମୋ ହସପିଟାଲ ମୋ ଗର୍ବ’ ଭଳି ଚାରୋଟି କାର୍ଯ୍ୟକ୍ରମକୁ ଗଞ୍ଜାମ ଜିଲ୍ଲାରେ ମିଳିତ ଭାବରେ ଆୟୋଜିତ କରାଯାଇଛି । ଜିଲ୍ଲାରେ ଏହି କାର୍ଯ୍ୟକ୍ରମକୁ ବ୍ୟାପକ କରାଯିବାକୁ ପ୍ରଶାସନ ନିଷ୍ପତ୍ତି ନେଇଥିବା ବେଳେ ଏହାର ଜିଲ୍ଲାସ୍ତରୀୟ କାର୍ଯ୍ୟକ୍ରମ ବ୍ରହ୍ମପୁର ଠାରେ ଅନୁଷ୍ଠିତ ହୋଇଯାଇଛି ।
ସ୍ଥାନୀୟ ଆଇ.ଏ.ସି ହଲ ପରିସରରେ ଆୟୋଜିତ କାର୍ଯ୍ୟକ୍ରମରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ , ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡାକ୍ତର ବିଜୟ କୁମାର ପାଣିଗ୍ରାହୀ , ଜିଲ୍ଲା ଶିକ୍ଷାଧିକାରୀ ସନାତନ ପଣ୍ଡାଙ୍କ ସମେତ ଜିଲ୍ଲା ସ୍ବାସ୍ଥ୍ୟ ବିଭାଗର ବହୁ ଅଧିକାରୀ ଉପସ୍ଥିତ ରହିଥିଲେ । ମୁଖ୍ୟତଃ ଜିଲ୍ଲାରେ ପୁଅ ଓ ଝିଅ ମଧ୍ୟରେ ପାର୍ଥକ୍ୟ ନରଖି ପ୍ରତ୍ୟେକ ପରିବାର ସୁଚିନ୍ତିତ ମତ ପ୍ରତିପୋଷଣ କରି କନ୍ୟା ଭ୍ରୂଣ ହତ୍ୟା ନକରିବା ପାଇଁ ଆହ୍ବାନ କରାଯାଇଛି । ‘ମୋ ଗେହ୍ଲା ଝିଅ’ ପାଳିତ କରାଯାଉଥିବା ବେଳେ ଏହି ଅବସରରେ କନ୍ୟାରତ୍ନ ଓ ମାଆ ମାନଙ୍କୁ ସମ୍ମାନ ଜଣାଇ ପୁଷ୍ପଗୁଚ୍ଛ ଦିଆଯାଇ ସମ୍ବର୍ଦ୍ଧନା ଦିଆଯାଇଥିଲା । ସେହିପରି ବାଲ୍ୟ ବିବାହ ପ୍ରଥାକୁ ନେଇ ସଚେତନ କରାଇବା ସହ କମ ବୟସରେ ବିବାହ କଲେ ସ୍ବାସ୍ଥ୍ୟଗତ ସମସ୍ୟାକୁ ନେଇ ନିର୍ଭୟା କଢୀକୁ ମାଧ୍ୟମରେ କିଶୋରୀ ବାଳିକାମାନଙ୍କୁ ଶପଥ ପାଠ କରାଯାଇଛି ।
ଜିଲ୍ଲାରେ ଗୁଣି ଗାରେଡି ଠାରୁ ଦୂରେଇ ରହିବା ପାଇଁ ମୋ ସଚେତନ କାର୍ଯ୍ୟକ୍ରମ କରାଯିବା ସହ ପ୍ରତ୍ୟେକ ସରକାରୀ ହସ୍ପିଟାଲରେ ଜନସାଧାରଣଙ୍କ ସହଭାଗିତାକୁ ଆହ୍ବାନ କରି ମୋ ହସପିଟାଲ୍ ମୋ ଗର୍ବ ଭଳି କାର୍ଯ୍ୟକ୍ରମ ଆୟୋଜନ କରାଯାଇଛି । ଏହାକୁ ଜିଲ୍ଲାବ୍ୟାପୀ କରାଯାଇ ଲୋକଙ୍କୁ ଅଧିକରୁ ଅଧିକ ସଚେତନତା କରିବା ମୁଖ୍ୟ ଲକ୍ଷ୍ୟ ବୋଲି କୁହାଯାଇଛି । ଜିଲ୍ଲା ସ୍ତରୀୟ କାର୍ଯ୍ୟକ୍ରମ ସହିତ ଏହାର ଉପକଣ୍ଠ ସ୍ତରୀୟ ଏବଂ ପଞ୍ଚାୟତ ସ୍ତରରେ ମଧ୍ୟ ଆୟୋଜିତ କରାଯିବ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ ଇଟିଭି ଭାରତ
