ବ୍ରହ୍ମପୁର: ସାଧାରଣ ନିର୍ବାଚନ ପାଇଁ ସବୁଠି ଚାଲିଛି ଜୋରଦାର ନିର୍ବାଚନୀ ପ୍ରସ୍ତୁତ । ନିଜ ନିଜ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରୁଛନ୍ତି ଦଳର ହେଭିୱେଟ ନେତାଏ। ଏହି କ୍ରମରେ ଗଞ୍ଜାମରେ ବିଜେପି ଦଳୀୟ ନେତାଙ୍କ ପାଇଁ ପ୍ରଚାର କରିଛନ୍ତି କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଜିଲ୍ଲାର ଦିଗପହଣ୍ଡି ନିର୍ବାଚନ ମଣ୍ଡଳୀରେ ନିଜ ପ୍ରାର୍ଥୀଙ୍କ ପାଇଁ ଆୟୋଜିତ ସାଧାରଣ ସଭାରେ ପ୍ରଚାର କରିବା ପରେ ବ୍ରହ୍ମପୁରରେ ରୋଡ ଶୋ କରିଛନ୍ତି ସେ ।
ବିଜେପିର ବ୍ରହ୍ମପୁର ସାଂସଦ ପ୍ରାର୍ଥୀ ଭୃଗୁ ବକ୍ସିପାତ୍ର ଓ ବ୍ରହ୍ମପୁର ବିଧାନସଭା ପ୍ରାର୍ଥୀ କାହ୍ନୁଚରଣ ପତି ଓ ଗୋପାଳପୁର ପ୍ରାର୍ଥୀ ବିଭୂତି ଜେନାଙ୍କୁ ନେଇ ଏହି ପ୍ରଚାର କାର୍ଯ୍ୟ କରିଛନ୍ତି କେନ୍ଦ୍ରମନ୍ତ୍ରୀ । ସ୍ଥାନୀୟ ଆମ୍ବପୁଆ ବିବେକବିହାର ଠାରୁ ଆରମ୍ଭ ହୋଇ ସୁବାରାଓ ଛକ ଦେଇ କେନ୍ଦ୍ର ମନ୍ତ୍ରୀ ମାଆ ବୁଢ଼ୀ ଠାକୁରାଣୀଙ୍କ ଅସ୍ଥାୟୀ ମନ୍ଦିରରେ ପହଞ୍ଚିଥିଲେ । ସେଠାରେ ସେ ଠାକୁରାଣୀଙ୍କୁ ଦର୍ଶନ କରିଥିଲେ ।
ଏହି ଅବସରରେ କେନ୍ଦ୍ରମନ୍ତ୍ରୀ କହିଛନ୍ତି,ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଓଡିଶାବାସୀଙ୍କ ଗଭୀର ଆସ୍ଥା ରହିଛି । କେନ୍ଦ୍ର ଓ ରାଜ୍ୟରେ ବିଜେପି ସରକାର ଗଢିବାକୁ ଯାଉଛି ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ନ୍ୟୁଜ
