ବ୍ରହ୍ମପୁର: ଗଞ୍ଜାମ ଓ ଗଜପତି ଜିଲ୍ଲାର ସୀମାବର୍ତ୍ତୀ ତପ୍ତପାଣି ଘାଟିରେ ଟ୍ରକ ଓଲଟି ଜଣଙ୍କର ମୃତ୍ୟୁ ଘଟିଛି । ପାଟପୁର ଥାନା ଅନ୍ତର୍ଗତ ତପ୍ତପାଣି ଘାଟିରେ ଦୀର୍ଘ ଦିନର ବ୍ୟବଧାନ ପରେ ପୁଣିଥରେ ଏଭଳି ଏକ ଦୁର୍ଘଟଣା ଘଟିଛି । ଏକ 10 ଚକିଆ ମାଲବାହୀ ଟ୍ରକ ଓଲଟିବା ଯୋଗୁଁ ଗାଡିର ହେଲପରର ମୃତ୍ୟୁ ଘଟିଛି । ମୃତ ହେଲପର ଜଣକ ଗଞ୍ଜାମ ଜିଲ୍ଲା ହିଞ୍ଜିଳି ଥାନା ଅନ୍ତର୍ଗତ ଆଙ୍କୋରଡା ଗ୍ରାମର ମନୋଜ ଗୈାଡ ବୋଲି ଜଣାପଡିଛି ।
ସୂଚନାନୁଯାୟୀ ବୁଧବାର ଅପରାହ୍ନରେ ଗଜପତିରୁ ବ୍ରହ୍ମପୁର ଅଭିମୁଖେ ଫେରୁଥିବା ଟ୍ରକ ତପ୍ତପାଣି ନିକଟସ୍ଥ ମୃଗବିହାର ପାଖରେ କୌଣସି କାରଣରୁ ଭାରସାମ୍ୟ ହରାଇ ଟ୍ରକ ଓଲଟି ପଡ଼ିଥିଲା । ଘଟଣାସ୍ଥଳରେ ଗାଡି ଚାଳକ ସୁରକ୍ଷିତ ଥିବା ବେଳେ ହେଲପର ଜଣକ ଗାଡ଼ି ତଳେ ଚାପି ହୋଇ ରହିଯାଇଥିଲା । ଖବରପାଇ ପାଟପୁର ଥାନା ପୋଲିସ ଓ ସାନଖେମୁଣ୍ଡି ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ଚାପି ହୋଇ ରହିଥିବା ହେଲପରର ମୃତଦେହକୁ କଟର ମେସିନ ସାହାଯ୍ୟରେ କାଟି ଉଦ୍ଧାର କରିବା ସହ ମୃତଦେହ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ଏମକେସିଜି ପଠାଇ ଦିଆଯାଇଛି । ଏନେଇ ପାଟପୁର ଥାନାରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
