ବାଲେଶ୍ଵର: ଜିଲ୍ଲାର ଅନେକ ଚାଷ ମଧ୍ୟରୁ ଆଖୁ ଚାଷ ଅନ୍ୟତମ। ଆଖୁଚାଷ କରି ପରିବାର ପୋଷିବା ପାଇଁ ଅଣ୍ଟା ଭିଡୁଥିବା ଚାଷୀର କଥା କହିଲେ ନସରେ। ଚଳିତବର୍ଷ ଏତେ ପରିଶ୍ରମ କରି ଆଖୁ ଅମଳ ପରେ ଆଖୁଚାଷରେ ଲାଭ ଅତି ନୈରାଶ୍ୟଜନକ। ସରକାରୀ ଦୃଷ୍ଟି ଆଢୁଆଳରେ ଆଖୁଚାଷୀମାନେ ରହି ଯାଇଛନ୍ତି। କୌଳିକ ବୃତ୍ତିରୁ ନା ଓହରି ପାରୁଛନ୍ତି ନା ପରିଶ୍ରମର ଉପଯୁକ୍ତ ପାରିଶ୍ରମିକ ପାଉଛନ୍ତି। ଏମିତି ଅନିଶ୍ଚିତତା ଭିତରେ ରହିଛି ଆଖୁଚାଷୀଙ୍କ ଭାଗ୍ୟ।
ବାଲେଶ୍ଵର ଜିଲ୍ଲା ବସ୍ତା ବ୍ଲକ ଗିଲାଯୋଡି ଅଞ୍ଚଳରେ ହୋଇଛି ଏକର ଏକର ଜମିରେ ଆଖୁଚାଷ। ସୁବର୍ଣ୍ଣରେଖା ନଦୀ ଅବବାହିକା ଅଞ୍ଚଳରେ ଆଖୁଚାଷ ଭଲ ହେଉଥିବାରୁ କିଛି ଲାଭ ଆଶାରେ ଚାଷୀମାନେ ଆଖୁଚାଷ କରିଥାନ୍ତି। ହେଲେ ଆଖୁ ବିକ୍ରି ପାଇଁ କୌଣସି ସୁବ୍ୟବସ୍ଥା ବାଲେଶ୍ଵରରେ ନଥିବାରୁ ସେମାନଙ୍କୁ ନିରାଶ ହେବାକୁ ପଡେ।
ଆଖୁ ଚାଷର 13ମାସ ପରେ ଅମଳ ହୋଇଥାଏ। ଅମଳ ଆଖୁ ବିକ୍ରି କରିବାର ବ୍ୟବସ୍ଥା ନଥିବାରୁ ଚାଷୀମାନେ ଗୁଡ଼ ତିଆରି କରି ବିକ୍ରି କରିଥାନ୍ତି। ଅନେକ ସମୟରେ ଚାଷୀମାନେ ବାହାରକୁ ଆଖୁ ରପ୍ତାନି କରିବା ନେଇ ଆଶାବାଦୀ ଥିବାବେଳେ ଦଲାଲଙ୍କ ଦ୍ବାରା ଶୋଷଣ ହୋଇଥାନ୍ତି। ଅମଳ ଆଖୁ ଗୁଡ଼ ହେବାଯାଏ ଅନେକ ପରିଶ୍ରମ ହେଉଥିବାବେଳେ ବଜାରରେ କ୍ବଣ୍ଟାଲ ପ୍ରତି 4ହଜାର ଟଙ୍କାରେ ଗୁଡ଼ ବିକ୍ରି କରିଥାନ୍ତି। ଏବେ ନାନା ପ୍ରକାର ଗୁଡ଼ ବଜାରକୁ ଆସୁଥିବା ବେଳେ ଦେଶୀ ଗୁଡ଼ର ଚାହିଦା ବି ରହୁନି ବୋଲି ଚାଷୀମାନେ କହିଛନ୍ତି।
ବର୍ତମାନ ଆଖୁର ଠିକ ଦର ମିଳୁ ନଥିବାରୁ ଚାଷୀଙ୍କୁ ନିରାଶ ହେବାକୁ ପଡୁଛି। ଅଭାବୀ ବିକ୍ରି ସମସ୍ୟା ଆଖୁଚାଷୀଙ୍କ ପାଇଁ କାଳ ହୋଇଛି। ନା ସରକାର, ନା ପ୍ରଶାସନ, ସେମାନଙ୍କ ସମସ୍ୟା ପ୍ରତି ସମସ୍ତେ ଆଖିବୁଜି ଦେଇଥିବା ଅଭିଯୋଗ କରିଛନ୍ତି।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
