ନୂଆଦିଲ୍ଲୀ: ଚଳିତ ଆର୍ଥିକ ବର୍ଷ(2019-20)ରେ ଦେଶର ବାସ୍ତବ ଜିଡିପି ହାର 5 ପ୍ରତିଶତରୁ କମ ରହିବ । ଆଇଏଚଏସ ମାର୍କିଟ ପକ୍ଷରୁ ଏ ନେଇ ଅନୁମାନ କରି ରିପୋର୍ଟ ପ୍ରକାଶ ପାଇଛି ।
ସଂସ୍ଥା ଦର୍ଶାଇଛି ଯେ, ବର୍ତ୍ତମାସ ଦେଶରେ ଦେଖାଦେଇଥିବା ଅର୍ଥନୈତିକ ସମସ୍ୟା ଯୋଗୁଁ ଦେଶର ମେରୁଦଣ୍ଡ ଧିମେଇ ପଡିଛି । ତେବେ ଅର୍ଥବ୍ୟବସ୍ଥାକୁ ଗତି ଦେବା ପାଇଁ ସରକାରଙ୍କ ଦ୍ବାରା ନିଆଯାଉଥିବା ପଦକ୍ଷେପ ଦେଖାଇବାକୁ କିଛି ସମୟ ଲାଗିବ ।
ସେପଟେ ବ୍ୟାଙ୍କିଙ୍ଗ କ୍ଷେତ୍ରରେ ଅନାଦେୟ ଋଣ ବୃଦ୍ଧି ଯୋଗୁଁ ରାଷ୍ଟ୍ରାୟତ ବ୍ୟାଙ୍କ ଗୁଡିକ ନୂଆ ଋଣ ପ୍ରଦାନକୁ ଏହା ପ୍ରଭାବିତ କରୁଛି । ସେହିଭଳି ଅଣ ବ୍ୟାଙ୍କ ଆର୍ଥିକ କମ୍ପାନୀ(ଏନବିଏଫସି) କ୍ଷେତ୍ରରେ ଲିକ୍ୟୁଡିଟି ସମସ୍ୟା ଜାରି ରହିଛି । ଏହା ଦ୍ବାରା ବିଭିନ୍ନ ପ୍ରକଳ୍ପ କାମ ପ୍ରଭାବିତ ହେଉଛି । ଏଣୁ ଏଥର ଅଭିବୃଦ୍ଧି 5 ପ୍ରତିଶକୁ କମ ରହିବା ନେଇ ଆଶଙ୍କା ରହିଛି ।
ପ୍ରକାଶ ଯେ, ଚଳିତ ଆର୍ଥିକ ବର୍ଷର ଦ୍ବିତୀୟ ତ୍ରୈୟମାସରେ ମୋଟ ଘରୋଇ ଉତ୍ପାଦ 4.5 ପ୍ରତିଶତକୁ ହ୍ରାସ ପାଇଛି । ଯାହାକି 6 ବର୍ଷରେ ସର୍ବନିମ୍ନ । ଏହା ପୂର୍ବରୁ ପ୍ରଥମ ତ୍ରୈୟମାସରେ ମଧ୍ୟ ଜିଡିପି 5 ପ୍ରତିଶକୁ ଖସିଥିଲା । ଯେତେବେଳେ କି ଗତ ଆର୍ଥିକ ବର୍ଷ ସମାନ ତ୍ରୈୟମାସରେ ଏହା 7 ପ୍ରତିଶତ ଥିଲା ।
ବଡ କଥା ଯେ, ଏହା ପୂର୍ବରୁ ଭାରତୀୟ ରିଜର୍ଭ ବ୍ୟାଙ୍କ ମଧ୍ୟ ଦେଶର ଜିଡିପି ଆକଳନକୁ 6.1 ପ୍ରତିଶତରୁ ହ୍ରାସ କରି 5 ପ୍ରତିଶତ କରିଛି ।
