ନୂଆଦିଲ୍ଲୀ: ଏପ୍ରିଲ ପହିଲାରୁ ଖୋଲିବ କ୍ଷୁଦ୍ର ବ୍ୟବସାୟୀଙ୍କ ଭାଗ୍ୟ । ଜିଏସଟି ବୋଝରୁ ମିଳିବ ଆଶ୍ବସ୍ତି । 40 ଲକ୍ଷ ପର୍ଯ୍ୟନ୍ତ କାରବାର ଉପରେ ଆଉ ଦେବାକୁ ପଡିବନି ଜିଏସଟି । ଫଳରେ ବୃଦ୍ଧି ପାଇବ ଏମଏସଏମଇ(ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ) ସେକ୍ଟର ଚାହିଦା ।
2019-20 ଆର୍ଥିକ ବର୍ଷ ଅନ୍ତରୀଣ ବଜେଟରେ ମୋଦି ସରକାର କ୍ଷୁଦ୍ର ବ୍ୟବସାୟୀଙ୍କୁ ଭେଟି ସ୍ବରୁପ ଜିଏସଟି ଛାଡ ଘୋଷଣା କରିଥିଲେ । 40ଲକ୍ଷ ପର୍ଯ୍ୟନ୍ତ କାରବାର ସମ୍ପୂର୍ଣ୍ଣ ଜିଏସଟି ଫ୍ରି ରହିବ ବୋଲି ବଜେଟରେ ଉପସ୍ଥିତ କରିଥିଲେ । ଏହି ନୂଆ ନିୟମକୁ ଆସନ୍ତା ଏପ୍ରିଲ ପହିଲାରୁ କାର୍ଯ୍ୟକାରୀ କରାଯିବ । ଗୁରୁବାର ଏ ନେଇ ସଂସଦରେ ଅଧିସୂଚନା ଜାରି କରାଯାଇଛି ।
ଅର୍ଥମନ୍ତ୍ରୀ ଅରୁଣ ଜେଟଲିଙ୍କ ଅଧ୍ୟକ୍ଷତାରେ ବସିଥିବା ୩୨ ତମ ଜିଏସଟି କାଉନସିଲ ବୈଠକରେ ମଧ୍ୟ ଏ ନେଇ ନିଷ୍ପତି ନିଆଯାଇଥିଲା । କ୍ଷୁଦ୍ର ଓ ମଧ୍ୟମ ଉଦ୍ୟୋଗୀଙ୍କ ପାଇଁ ଜିଏସଟି ଛାଡ ସୀମା ୨ ଗୁଣ ବୃଦ୍ଧି କରାଯାଇ 20 ଲକ୍ଷରୁ 40 ଲକ୍ଷ କରାଯାଇଛି । ଏଥିସହ କମ୍ପୋଜିସନ ସ୍କିମର ପରିସରକୁ 1 କୋଟିରୁ ବଢାଇ 1.5 କୋଟି କରି ଦିଆଯାଇଛି । ଏହା ଦ୍ବାରା ବାର୍ଷିକ ଦେଢ କୋଟି ଟଙ୍କାର ଟର୍ଣ୍ଣଓଭର କରୁଥିବା ବ୍ୟବସାୟୀ ଲାଭପ୍ରଦ ହୋଇପାରିବେ ।
