ନୂଆଦିଲ୍ଲୀ: 6 ବଡ ଚୁକ୍ତି ପରେ ପୁଣି ରିଲାଏନ୍ସ ଜିଓ ପ୍ଲାର୍ଟଫର୍ମରେ ନିବେଶ ପରିମାଣ ବଢାଇଲା ସିଲଭର ଲେକ । ଜିଓରେ ଅତିରିକ୍ତ 4,546.80 କୋଟି ଟଙ୍କା ନିବେଶ କରିଛି ଆମେରିକାର ଘରୋଇ ଇକ୍ୟୁଟି ଫାର୍ମ ସିଲଭର ଲେକ ଓ ତାହାର ସହ ନିବେଶକ। ଏକ ବିବୃତ୍ତି ଜାରି କରି ରିଲାଏନ୍ସ ପକ୍ଷରୁ ଏ ନେଇ ସୂଚନା ଦିଆଯାଇଛି ।
ପ୍ରକାଶ ଯେ, ମେ 4ରେ ସିଲଭର ଲେକ ଜିଓ ପ୍ଲାର୍ଟଫର୍ମରେ 5,655.75 କୋଟି ନିବେଶ କରିଥିଲା । ଏହି 2ଟି ନିବେଶକୁ ମିଶାଇଲେ ସିଲଭର ଲେକ ଓ ତାର ସହ ନିବେଶକଙ୍କ ଦ୍ବାରା ହୋଇଥିବା ମୋଟ ନିବେଶ 10,202.55 କୋଟି ଟଙ୍କାକୁ ବୃଦ୍ଧି ପାଇଛି ।
ପୂର୍ବଥର ଭଳି ଏହି ନିବେଶରେ ମଧ୍ୟ ସିଲଭର ଲେକ ଜିଓରେ ଇକ୍ୟୁଟି ଭେଲ୍ୟୁ 4.91 ଲକ୍ଷ କୋଟି ଟଙ୍କା ଦେଇଛି। ଏହି ପୁଞ୍ଜି ବିନିଯୋଗ ସହିତ ଗତ 6 ସପ୍ତାହରେ ଜିଓ ପ୍ଲାଟଫର୍ମ ଅଗ୍ରଣୀ ଟେକ୍ନୋଲୋଜି ନିବେଶକଙ୍କ ଠାରୁ 92,202.15 କୋଟି ଟଙ୍କା ସଂଗ୍ରହ କରିଛି ।
ସିଲଭର ଲେକ ଦ୍ବାରା କରାଯାଇଥିବା ମୋଟ ନିବେଶ ଉପରେ ଟିପ୍ପଣୀ ଦେଇ ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନୀ କହିଛନ୍ତି କି, ‘‘ସିଲଭର ଲେକ ଓ ଏହାର ସହ ନିବେଶକମାନେ ମୂଲ୍ୟବାନ ଅଂଶୀଦାର ଅଟନ୍ତି । ଆମେ ଭାରତୀୟ ଡିଜିଟାଲ ଇକୋସିଷ୍ଟରମର ବିକାଶ ଏବଂ ରୁପାନ୍ତର ଜାରି ରଖିଛୁ । ଏଭଳି ସ୍ଥିତିରେ ଆମେ ସେମାନଙ୍କ ଆତ୍ମବିଶ୍ବାସ ଓ ସମର୍ଥନ ସହ ବିଶ୍ବ ଟେକ୍ନୋଲୋଜି ନିବେଶରେ ସେମାନଙ୍କ ନେତୃତ୍ବ ତଥା ସେମାନଙ୍କ ମୂଲ୍ୟବାନ ସମ୍ପର୍କ ନେଟୱାର୍କ ପାଇଁ ଗୁରୁତ୍ବପୂର୍ଣ୍ଣ । ’’
