ନୂଆଦିଲ୍ଲୀ: ଅର୍ଥନୀତିକୁ ପ୍ରଗତିର ସଙ୍କେତ । ବଜେଟ ପରେ ପ୍ରକାଶ ପାଉଥିବା ବିଭିନ୍ନ ସେକ୍ଟର ରିପୋର୍ଟ ଅର୍ଥବ୍ୟବସ୍ଥାକୁ ଆଶ୍ବସ୍ତି ଦେଉଛି । ନୂଆ ବର୍ଷର ପ୍ରଥମ ମାସରେ ସୁଧିରିଛି ସେବା କ୍ଷେତ୍ର କାର୍ଯ୍ୟକଳାପ । ଆଇଏଚଏସ ମାର୍କିଟ ଇଣ୍ଡିଆର ସର୍ଭିସେସ ବିଜନେସ ଆକ୍ଟିଭିଟି ଇଣ୍ଡେକ୍ସ (ସେବା ପିଏମଆଇ) ଜାନୁଆରୀରେ 55.5 ପଏଣ୍ଟ ରହିଛି। ଯାହାକି 7 ବର୍ଷର ସର୍ବୋଚ୍ଚ ସ୍ତର ।
ନୂଆ ଅର୍ଡର ବୃଦ୍ଧି, ଅନୁକୂଳ ବଜାର ପରିସ୍ଥିତି ଓ କାରବାରୀଙ୍କ ସକରାତ୍ମକ ଧାରଣା ଜାରି ରହିଥିବାରୁ ଏହି ସେକ୍ଟରର କାର୍ଯ୍ୟକଳାପରେ ଉନ୍ନତି ଆସିପାରିଛି ।
2019 ଡିସେମ୍ବରରେ ଏହି ହାର 53.3 ପଏଣ୍ଟ ଥିଲା । ପୂରା ରିପୋର୍ଟ ସ୍ତରକୁ ଦେଖିଲେ ଜଣାପଡିଛି ଯେ, 2013 ପରେ ଏଭଳି ଅଭିବୃଦ୍ଧି କେବେ ଦେଖିବାକୁ ମିଳିନାହିଁ ।
ଅଧିକ ପଢନ୍ତୁ: କର୍ପୋରେଟକୁ ଜଗତକୁ ଆଶ୍ବସ୍ତି ଦେଲେ ସୁଧୁରିବ ଅର୍ଥନୀତି: ସୁବ୍ରମଣ୍ୟମ
ଆଇଏଚଏସ ମାର୍କିଟର ପ୍ରମୁଖ ଅର୍ଥଶାସ୍ତ୍ରୀ ପଲିୟାନା ଡି ଲୀମା କହିଛନ୍ତି ଯେ, 2020 ଆରମ୍ଭରେ ଭାରତର ସେବା କ୍ଷେତ୍ରକୁ ସ୍ପୁର୍ତ୍ତି ଫେରିଛି । ମାନ୍ଦାବସ୍ଥା ଆଶଙ୍କାରେ ମଧ୍ୟରେ ରହିଥିବା ସେବା କ୍ଷେତ୍ର 2019 ଶେଷ ସୁଦ୍ଧା ଭଲ ପ୍ରଦର୍ଶନ କରୁଛି । ଚୀନ, ୟୁରୋପ ଓ ଆମେରିକା ଚାହିଦା ହ୍ରାସ ପାଇଥିବାରୁ ଜାନୁଆରୀରେ ସେବା କ୍ଷେତ୍ରରେ ରପ୍ତାନୀ କମିଛି ।
ପ୍ରକାଶ ଯେ, ନିକଟରେ ପ୍ରକାଶ ପାଇଥିବା ମ୍ୟାନୁଫେକ୍ଚରିଂ ସେକ୍ଟର କାର୍ଯ୍ୟକଳାପ ସୂଚକାଙ୍କ ମଧ୍ୟ 8 ବର୍ଷର ରେକର୍ଡ ଭାଙ୍ଗି ସର୍ବୋଚ୍ଚ ସ୍ତରରେ ରହିଛି । ଆଇଏଚଏସ ମାର୍କେଟ ଇଣ୍ଡିଆର ମେନ୍ୟୁଫକଚରିଂ ପରଚେଜିଂ ମ୍ୟାନେଜର୍ସ ସୂଚକାଙ୍କ (ପିଏମଆଇ) ଜାନୁଆରୀରେ 55.9 ପଏଣ୍ଟ ରହିଥିଲା। ଯାହା ଦ୍ବାରା ଆଗକୁ ଉତ୍ପାଦନ ଓ ରୋଜଗାର ବଢିବ ବୋଲି ଆଶା କରାଯାଉଛି ।
