ନୂଆଦିଲ୍ଲୀ: ସୋମବାର ଅର୍ଥମନ୍ତ୍ରୀ ନିର୍ମଳା ସୀତାରମଣ ଉପସ୍ଥାପନ କରିବେ ଶତାବ୍ଦୀର ଐତିହାସିକ ବଜେଟ । ଉପସ୍ଥାପନ ହେବ 2021-22 ଆର୍ଥିକ ବର୍ଷର ଆୟବ୍ୟୟ ଅଟକଳ ହିସାବ । କୋରୋନା ପ୍ରଭାବିତ ଅର୍ଥନୀତିକୁ ଭିଟାମିନ ଦେବା ପାଇଁ ଆସିବ ବୁଷ୍ଟର ଡୋଜ । ଏପଟେ ମହାମାରୀରେ ପୀଡିତ 130 କୋଟି ଭାରତୀୟ ଚାହିଁ ବସିଛନ୍ତି ଅର୍ଥମନ୍ତ୍ରୀ କଣ କରିବେ ଘୋଷଣା, ଯାହା ଦ୍ବାରା ହାତକୁ ଆସିବ ଟଙ୍କା ।
ତେବେ ଏ ବର୍ଷ ବଜେଟ ହେବ ଖାସ ଓ ସ୍ବତନ୍ତ୍ର । ଇତିହାସରେ ପ୍ରଥମ ଥର ପାଇଁ ପେପରଲେସ ହେବ ବଜେଟ । ଏଥିରେ ବେତନଭୋଗୀଙ୍କ ପାଇଁ ଟିକସ ହ୍ରାସ ହୋଇପାରେ । କାରବାରୀଙ୍କୁ ରିଲିଫ ସହ କିଛି ସାମଗ୍ରୀ ମହଙ୍ଗା ଓ କିଛି ଶସ୍ତା ମଧ୍ୟ ହୋଇପାରେ । ସରକାର ଅନେକ ବସ୍ତୁ ଉପରେ ସୀମା ଶୁଳ୍କ ହ୍ରାସ ଓ ଡର୍ଜନରୁ ଅଧିକ ସାମଗ୍ରୀ ଉପରେ ଆମଦାନୀ ଶୁଳ୍କ ବୃଦ୍ଧି ହେବା ନେଇ ଆକଳନ କରିଛନ୍ତି ବିଶେଷଜ୍ଞ ।
ଏହା ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ତୃତୀୟ କେନ୍ଦ୍ର ବଜେଟ ହେବ । ସୀତାରମଣ ବଜେଟ ଅଧିବେଶର ପ୍ରଥମ ପର୍ଯ୍ୟାୟ ଫେବୃଆରୀ 15କୁ ଶେଷ ହେବ । ଦ୍ବିତୀୟ ପର୍ଯ୍ୟାୟ ମାର୍ଚ୍ଚ 8 ରୁ ଆରମ୍ଭ ହୋଇ ଏପ୍ରିଲ 8 ଯାଏଁ ଚାଲିବ ।
ତେବେ ଗୋଟିଏ ଅନ୍ତରୀଣ ବଜେଟ ସମେତ ମୋଦି ସରକାରଙ୍କ ଏହା ନବମ ବଜେଟ ହେବାକୁ ଯାଉଛି । ଏହି ବଜେଟ ଏଭଳି ସମୟରେ ଉପସ୍ଥାପନ ହେବ, ଯେବେ କୋଭିଡ-19 ସଙ୍କଟରୁ ଦେଶ ମୁକୁଳୁଛି । ଅର୍ଥନୀତି ସୁଧାର ପଥରେ ଯାଉଛି । ଏଣୁ ଅର୍ଥନୀତିକୁ ଗତିଶୀଳ ପାଇଁ ସରକାର ବ୍ୟାପକ ରୂପରେ ରୋଜଗାର ସୃଷ୍ଟି ଓ ଗ୍ରାମୀଣ ବିକାଶ ଉପରେ ଖର୍ଚ୍ଚକୁ ବଢାଇବା, ବିକାଶ ଯୋଜନା ପାଇଁ ଆବଣ୍ଟନ, କରଦାତାଙ୍କୁ ଅଧିକ ସଞ୍ଚୟ ସୁଯୋଗ ଓ ବିଦେଶୀ କରକୁ ଆକର୍ଷିତ କରିବା ପାଇଁ ନିୟମକୁ ସହଜ କରିବା ନେଇ ଆଶା ରହିଛି।
