ନୂଆଦିଲ୍ଲୀ: ଲକଡାଉନ ଜାରି ରହିଥିବାରୁ ଗ୍ରାହକଙ୍କୁ ଆଶ୍ବସ୍ତି ଦେବାକୁ ବ୍ୟାଙ୍କ 3 ମାସର ଇଏମଆଇ କିସ୍ତି ସ୍ଥଗିତ କରିଛି । ହେଲେ ଏହାର ଫାଇଦା ଉଠାଉଥିବା ଠକଙ୍କ ଠାରୁ ସତର୍କ ପାଇଁ ଗ୍ରାହକଙ୍କୁ ଚେତାବନୀ ଦେଇଛି ବ୍ୟାଙ୍କ ।
ଫୋନ କିମ୍ବା ଅନ୍ୟ କୌଣସି ଜରିଆରେ ନିଜର ଓଟିପି ଓ ପିନ ଭଳି ସମ୍ବେଦନଶୀଳ ତଥ୍ୟ କାହାକୁ ନ ଦିଅନ୍ତୁ । ଏ ନେଇ ଆକ୍ସିସ ବ୍ୟାଙ୍କ , ଭାରତୀୟ ଷ୍ଟେଟ ବ୍ୟାଙ୍କ ସମେତ ବହୁ ବ୍ୟାଙ୍କ ଇମେଲ ପଠାଇ ଗ୍ରାହକଙ୍କୁ ସତର୍କ କରାଉଛନ୍ତି ।
ନିକଟରେ ଘୋଷଣା ହୋଇଥିବା ଇଏମଆଇ ରିଲିଫ ଯୋଜନାର ସାହାରା ନେଇ ବିଭିନ୍ନ ଉପାୟରେ ସାଇବର ଅପରାଧୀମାନେ ଟଙ୍କା ହେରଫେର କରିପାରନ୍ତି ବୋଲି ବ୍ୟାଙ୍କ ସତର୍କ କରାଇଛି ।
ଭାରତୀୟ ଷ୍ଟେଟ ବ୍ୟାଙ୍କ ମଧ୍ୟ ଟ୍ବିଟ କରି ସାଇବର ଅପରାଧୀଙ୍କ ଠାରୁ ସତର୍କ ସହ ଜାଗୃତ ରହିବାକୁ ଗ୍ରାହକଙ୍କୁ ଜଣାଇଛି ।
ବ୍ୟାଙ୍କ କହିଛି ‘ଏଭଳି ଉପାୟରେ ଗ୍ରାହକଙ୍କ ପାଖକୁ ଫୋନ ଆସେ, ଆଉ ଇଏମଆଇ କିସ୍ତି ଟାଳିବା ପାଇଁ ଓଟିପି ପଚାରାଯାଏ, ଯଦି ଗ୍ରାହକ ଓଟିପି କହିଦିଅନ୍ତୁ ତେବେ ସେମାନଙ୍କ ଆକାଉଣ୍ଟ ଖାଲି ହୋଇଯାଇପାରେ ବୋଲି ବ୍ୟାଙ୍କ ସାବଧାନ କରାଇଛି ।
