ନୂଆଦିଲ୍ଲୀ: ବଢୁଲା ନୀରବ ମୋଦିଙ୍କ ଅଡୁଆ । ବାରମ୍ବାର ଜମିନ ଆବେଦନ ଖାରଜ ହେଉଥିବା ବେଳେ ଏବେ ପୁଣି ମିଳିଛି ଆଉ ଏକ ବଡ ଝଟକା । ପଞ୍ଜାବ ନ୍ୟାସନାଲ ବ୍ୟାଙ୍କକୁ ସୁଧ ସହ 7300 କୋଟି ଟଙ୍କା ଫେରାଇବାକୁ ଶନିବାର ପୁନେସ୍ଥିତ ଋଣ ଆଦାୟକାରୀ ଅଧିକରଣ (DRT) ନୀରବଙ୍କ ନାଁ ରେ ଏକ ପ୍ରସ୍ତାବ ପାରିତ କରିଛି ।
ଏହା ପୂର୍ବରୁ ସିଙ୍ଗାପୁର ଉଚ୍ଚ ନ୍ୟାୟଳୟ ନୀରବ ଓ ତାଙ୍କ ସମ୍ପର୍କୀୟ-ସହଯୋଗୀଙ୍କ ଆକାଉଣ୍ଟ ଫ୍ରିଜ କରି 44.41 କୋଟି ଟଙ୍କା ଜବତ କରିଥିଲେ । ତା ପୂର୍ବରୁ ଇଡି ଆବେଦନ କ୍ରମେ ସ୍ବିସ୍ ବ୍ୟାଙ୍କ ଅଧିକାରୀ ନୀରବ ଓ ଭଉଣୀ ପୂରବୀ ମୋଦିଙ୍କ 4 ଟି ଆକାଉଣ୍ଟ ଜବତ କରାଯାଇଥିଲା । ଏଥିରେ 283.16 କୋଟି ଟଙ୍କା ଜମା ଥିଲା ।
ପ୍ରକାଶ ଥାଉ ଯେ, ନୀରବ ମୋଦି ଏବଂ ତାଙ୍କ ମାମୁଁ ମେହୁଲ ଚୋକସି ପଞ୍ଜାବ ନ୍ୟାସନାଲ ବ୍ୟାଙ୍କରୁ ପ୍ରାୟ ୧୩,୦୦୦ କୋଟି ଟଙ୍କା ଋଣ ନେଇ ଫେରାର ହୋଇଯାଇଛି । ଏବେ ସେ ବ୍ରିଟେନ ଜେଲରେ ବନ୍ଦୀ ରହିଛି ।
