ନୂଆଦିଲ୍ଲୀ: କୋରୋନା କଟକଣା ଯୋଗୁଁ ଭାରତୀୟ ବିମାନ କ୍ଷେତ୍ର ଓ ତାହା ଉପରେ ନିର୍ଭର ଉଦ୍ୟୋଗର 29 ଲକ୍ଷ ପଦବୀ ବିପଦରେ । ଏକ ବୈଶ୍ବିକ ବିମାନ ସଂଘ IATA ଶୁକ୍ରବାର ଏ ନେଇ ଆଶଙ୍କା କରି ରିପୋର୍ଟ ପ୍ରକାଶ କରିଛି । କୋରୋନା ଭାଇରସ ସଂକ୍ରମଣ ରୋକିବାକୁ ଦେଶବ୍ୟାପି ମାର୍ଚ୍ଚ 25ରୁ ଲକଡାଉନ ଜାରି ରହିଛି । ଏଥିପାଇଁ ସମସ୍ତ ଉଡାଣ ସେବା ବନ୍ଦ ରହିଛି ।
ଅନ୍ତରାଷ୍ଟ୍ରୀୟ ବାୟୁ ପରିବହନ ସଂଘ(ଆଇଏଟିଏ)ର ସଦ୍ୟ ଅନୁମାନ ମୁତାବକ ଏସିଆ ପ୍ରଶାନ୍ତ କ୍ଷେତ୍ରରେ କୋରୋନା ଭାଇରସ ପ୍ରକୋପ ବଢିବା ସହ ଭାରତ ଏହା ଦ୍ବାରା ଗଭୀର ଭାବେ ପ୍ରଭାବିତ ହେଉଛି ।
ଲକଡାଉନ ଯୋଗୁଁ ଆର୍ଥିକ ଗତିବିଧି ଗୁରୁତର ହୋଇପଡିଛି । ଏଥିଯୋଗୁଁ ସବୁଠୁ ଅଧିକ କ୍ଷତି ବିମାନ ଓ ପର୍ଯ୍ୟଟନ କ୍ଷେତ୍ରକୁ ସହିବାକୁ ପଡିଛି । ସଂସ୍ଥାର ରିପୋର୍ଟ ଅନୁଯାୟୀ ଏହି ଲକଡାଉନ ଯୋଗୁଁ ଭାରତୀୟ ବଜାର ଦ୍ବାରା ପରିଚାଳନା କରୁଥିବା ବିମାନ କମ୍ପାନୀଙ୍କୁ 85,000 କୋଟିରୁ ଉଦ୍ଧ୍ବ ରାଜସ୍ବ ହରାଇବାକୁ ପଡିପାରେ, ଯାହା 2019 ତୁଳନାରେ ଯାତ୍ରୀ ଆୟଠୁ କମ ରହିବ ।
IATA ହେଉଛି ପାଖାପାଖୀ 290 ବିମାନ କମ୍ପାନୀର ଏକ ସମୂହ । ଯେଉଁଥିରେ ଏୟାର ଇଣ୍ଡିଆ, ଭିସ୍ତାରା, ଇଣ୍ଡିଗୋ ଏବଂ ସ୍ପାଇସଜେଟ ସାମିଲ ରହିଛି ।
