ନୂଆଦିଲ୍ଲୀ: ନିର୍ବାଚନ ପରେ ଅଟୋ ଯାତ୍ରା ହେବ ମହଙ୍ଗା। ଗଣିବାକୁ ପଡିବ ଅଧିକ ଭଡା। କାରଣ ମେ ମାସ ଶେଷରେ ଲାଗୁ ହେବ ବର୍ଦ୍ଧିତ ଅଟୋ-ରିକ୍ସା ଭଡା ବିଲ। ଏହା ପରେ ଟ୍ୟାକ୍ସି, ଗ୍ରାମୀଣ ଯାନସେବା ଓ ଆରଟିବି ଆଦି ଭଡାରେ ମଧ୍ୟ ପରିବର୍ତ୍ତନ କରାଯିବ।
ପ୍ରକାଶ ଥାଉ ଯେ, ପୂର୍ବରୁ ଦିଲ୍ଲୀ କ୍ୟାବିନେଟ ଏହି ବିଲକୁ ମଞ୍ଜୁରୀ ଦେଇସାରିଛନ୍ତି । ହେଲେ ନିର୍ବାଚନ ଆଚରଣ ବିଧି ଲାଗୁ ଯୋଗୁଁ ଏହାକୁ କାର୍ଯ୍ୟକାରୀ କରାଯାଇନଥିଲା । ମେ 23ରେ ଫଳାଫଳ ବାହାରିବା ପରେ ଏହି ପ୍ରସ୍ତାବ ଲାଗୁ ହେବ ।
ଦିଲ୍ଲୀ କ୍ୟାବିନେଟ ପ୍ରସ୍ତାବ ମୁତାବକ, ପ୍ରତି କିଲୋମିଟର ପିଛା ଭଡା ବଢି 9ଟଙ୍କା 50 ପଇସା ହେବ । ବର୍ତ୍ତମାନ ଅଟୋରେ କିମି ପିଛା ଭଡା 8 ଟଙ୍କା ରହିଛି । ଏହା ସହ 2 କିଲୋମିଟରକୁ ବେସ ଫେୟର 25 ପଇସା ରହିଛି । ହେଲେ ଏବେ ନୂଆ ନିୟମ ଅନୁଯାୟୀ ଏହା 500 ମିଟର ହ୍ରାସ ପାଇ ଦେଢ କିମିରେ ଚାର୍ଜ ଆଦାୟ ହେବ । ଏହି ନିୟମ ଖାସ ଦିଲ୍ଲୀବାସୀଙ୍କ ପାଇଁ ରହିବ ।
