ରାଉରକେଲା: ବିଶ୍ବକପକୁ ନେଇ ଚାଲିଛି ବେଟିଂ । ଏଥିପାଇଁ ପ୍ରତିଦିନ ଲକ୍ଷ ଲକ୍ଷ ଟଙ୍କା ଲାଗୁଛି ବାଜି । ଏହି କ୍ରମରେ ସୋମବାର ରାଉରକେଲା ସହରରେ ବିଶ୍ବକପ୍ ବେଟିଂର ପର୍ଦ୍ଦାପାସ କରିଛି ପୋଲିସ । ଏଥିରେ 2 ଜଣଙ୍କୁ ଗିରଫ କରାଯାଇଛି । ଗିରଫ ପରେ ରାଉରକେଲା ଏସପି ଡା. ସାର୍ଥକ ଷଢଙ୍ଗୀ ସାମ୍ବାଦିକମାନଙ୍କୁ ସୂଚନା ଦେଇଥିଲେ । ଆବଶ୍ୟକ ପଡିଲେ ଘଟଣାର ମୁଖ୍ୟ ଅଭିଯୁକ୍ତକୁ ଧରିବା ପାଇଁ ପୋଲିସ ଟିମ୍ ଅନ୍ୟ ରାଜ୍ୟକୁ ଯିବେ ।
ତେବେ ଗିରଫ ଅଭିଯୁକ୍ତ ହେଲେ ଦେଓଗାଁର ସୁନୀଲ ଅଗ୍ରୱାଲ ଓ ନଗରମାଲ ଅଗ୍ରୱାଲ । ସେମାନଙ୍କ ନିକଟରୁ 31 ଲକ୍ଷ 17 ହଜାର 570 ଟଙ୍କା ସହ 17ଟି ମୋବାଇଲ, 3ଟି କାଲକ୍ୟୁଲେଟର ଏବଂ ଗୋଟିଏ ଏଲଇଡି ଟିଭି ଜବତ ହୋଇଛି ।
ସୂଚନାନୁସାରେ, ସୋମବାର ରାତିରେ ବିଶ୍ବକପ୍ ବେଟିଂ ଚାଲିଥିବା ନେଇ ଖବର ପାଇବା ପରେ ଦେଓଗାଁରେ ଚଢାଉ କରିଥିଲା ପ୍ଲାଣ୍ଟ ସାଇଟ୍ ପୋଲିସ । ଏହାପରେ ନଗରମାଲ ଘରେ ମଧ୍ୟ ଚଢାଉ କରାଯାଇଥିଲା । 2 ଦିନ ମଧ୍ୟରେ ନଗରମାଲ ତା ଝିଅର ବାହାଘର ପାଇଁ ୟୁଏସଏ ଯିବା ନେଇ ସୂଚନା ରହିଥିଲା । କିନ୍ତୁ ଏହା ପୂର୍ବରୁ ପୋଲିସ ତାକୁ ଗିରଫ କରିଛି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
