ଅନୁଗୋଳ: ଜମ୍ମୁ-କାଶ୍ମୀର ଅନନ୍ତନାଗରେ ସୋମବାର ହୋଇଥିବା ଆତଙ୍କବାଦୀ ଆକ୍ରମଣରେ ଜଣେ ଓଡିଆ ଯବାନ ଶହୀଦ ହୋଇଛନ୍ତି । ଶହୀଦ ଓଡିଆ ଯବାନ ଅଜିତ୍ ସାହୁଙ୍କ ଘର ଢେଙ୍କାନାଳ କାମାକ୍ଷାନଗର ବଡସୁଆଁଳ ଗାଁରେ । ଅଜିତ ଗତକାଲି(ସୋମବାର) ଶହୀଦ ହୋଇଥିବାବେଳେ ଆଜି ଆର୍ମି କ୍ୟାମ୍ପରୁ ତାଙ୍କ ବାପାଙ୍କ ପାଖକୁ ଫୋନ ଆସିଥିଲା ।
ସୂଚନାନୁାସରେ, ଅଜିତ୍ କୋଲକାତାରୁ ଟ୍ରାନ୍ସଫର ହୋଇ ସୋମବାର ଜମ୍ମୁ-କାଶ୍ମୀରକୁ ନିଜ କାର୍ଯ୍ୟରେ ଯୋଗ ଦେବାକୁ ଯାଉଥିଲେ । କିନ୍ତୁ ଅନନ୍ତନାଗ ନିକଟରେ ଆତଙ୍କବାଦୀମାନେ ଆଇଡ଼ି ବିସ୍ଫୋରଣ କରିଥିଲେ । ସେଠାରେ ତାଙ୍କୁ ଗୁରୁତର ଅବସ୍ଥାରେ ନିକଟରେ ଥିବା ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା । ମାତ୍ର ବିଳମ୍ବିତ ରାତିରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା ।
ଅଜିତ୍ ୨୦୧୫ରେ ପ୍ରଥମେ କୋଲକାତା ସେନାରେ ଯୋଗ ଦେଇଥିଲେ । ଶେଷ ଥର ପାଇଁ ସେ ଜୁନ ୧ ତାରିଖରେ ଘରକୁ ଆସି ଜୁନ ୯ରେ ଫେରିଯାଇଥିଲେ । ଜମ୍ମୁ-କାଶ୍ମୀର ସେନାରେ ଯୋଗ ଦେବାକୁ ଯାଉଥିବା ବେଳେ ସୋସିଆଲ ମିଡିଆରେ ସେ କିଛି ଅନୁଭୂତି ଲେଖିଥିଲେ । ଯାହାକୁ ପଢିଲେ ଲୋମ ଟାଙ୍କୁରି ଉଠୁଛି । ତେବେ ଅଜିତଙ୍କ ମୃତ୍ୟୁରେ ତାଙ୍କ ପରିବାର ବର୍ଗ ଓ ସ୍ଥାନୀୟ ବାସିନ୍ଦା ଦୁଃଖରେ ଭାଙ୍ଗିପଡିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
