ଖୋର୍ଦ୍ଧା: ସରକାରୀ ଜାଗାରୁ ଜବରଦଖଲ ଉଚ୍ଛେଦ ନ ହେବାରୁ ତହସିଲ ଅଫିସରେ ପଶି ଭଙ୍ଗାରୁଜା କରିଛନ୍ତି ଉତ୍ତ୍ୟକ୍ତ ଲୋକେ । ଅନେକ ଜରୁରୀ କାଗଜପତ୍ର ନଷ୍ଟ କରିବା ସହ ତହସିଲ ଅଫିସ ଗେଟକୁ ଭାଙ୍ଗିଛନ୍ତି ।
ବାଘମାରି ଥାନା ଅନ୍ତର୍ଗତ ପଙ୍ଗାରସିଂହ ଗ୍ରାମପଞ୍ଚାୟତର ଗୋଡି ପୋଖରୀ ଗ୍ରାମର ଏକ ସରକାରୀ ଜାଗା ଜବରଦଖଲ କରି ଦଣ୍ଡପାଣି ସିଂ ନାମକ ଜଣେ ବ୍ୟକ୍ତି ରହୁଥିଲେ । ଜବରଦଖଲ ଉଚ୍ଛେଦ ପାଇଁ ବ୍ୟକ୍ତିଙ୍କୁ ତହସିଲଦାର ଏକ ନୋଟିସ ଦେଇଥିଲେ । ମଙ୍ଗଳବାର ଜବରଦଖଲ ଉଚ୍ଛେଦ ହେବାର ଥିଲା । କିନ୍ତୁ ଆବଶ୍ୟକ ସଂଖ୍ୟକ ପୋଲିସ ଆସିନଥିବାରୁ ତହସିଲଦାର ନୋଟିସ କରିଥିବା ଜାଗାକୁ ଯାଇପାରିନଥିଲେ । ନିର୍ଦ୍ଧାରିତ ସମୟରେ ଉଚ୍ଛେଦ ନ ହେବାରୁ 20-30 ଜଣ ଗ୍ରାମବାସୀ ଆସି ତହସିଲଦାରଙ୍କ କାର୍ଯ୍ୟାଳୟରେ ଚେୟାର ଟେବୁଲ ଭାଙ୍ଗିବା ସହ ଗୁରୁତ୍ୱପୂର୍ଣ୍ଣ କାଗଜ ମଧ୍ୟ ଫୋପାଡି ଦେଇଥିଲେ । ଅଫିସରେ କାର୍ଯ୍ୟରତ ଥିବା କର୍ମଚାରୀଙ୍କୁ ଅଭଦ୍ର ଭାଷାରେ ଗାଳିଗୁଲଜ କରି କାଚ କବାଟକୁ ଭାଙ୍ଗି ଦେଇଥିଲେ ।
ଘଟଣା ଘଟିବା ସମୟରେ ତହସିଲଦାର ଅନୁପସ୍ଥିତ ଥିବାରୁ ତହସିଲ କର୍ମଚାରୀମାନେ ଥାନାରେ ଲିଖିତ ଅଭିଯୋଗ କରିଥିଲେ । ଖବର ପାଇ ଖୋର୍ଦ୍ଧା ଏସଡିପିଓ ଏବଂ ବିଭିନ୍ନ ଥାନାର ଥାନା ଅଧିକାରୀଙ୍କ ସହ ବେଗୁନିଆ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରି କେସ ନଂ 41/19ରେ ମାମଲା ରୁଜୁ କରି ୧୬ ଜଣ ଅଭିଯୁକ୍ତଙ୍କୁ ଗିରଫ କରିଥିବା ସୂଚନା ମିଳିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
