କଳାହାଣ୍ଡି:କଳାହାଣ୍ଡି ଜିଲ୍ଲା କଲମପୁର ବ୍ଲକ ଦେଇ ଯାଇଥିବା ଇନ୍ଦ୍ରାବତି ଜଳ ପ୍ରକଳ୍ପର ଡାହାଣ କେନାଲରେ ଘାଇ ହୋଇଯିବାରୁ ନିକଟସ୍ଥ ପଣ୍ଡିଗାଁ ଗତରାତିରୁ ଜଳମଗ୍ନ ହୋଇପଡିଛି । ସୂଚନା ମୁତାବକ ଗତରାତି ପ୍ରାୟ 2ଟାରେ କେନାଲର ଡାହାଣ ପାର୍ଶ୍ବର ଦକ୍ଷିଣ କେନାଲରେ ଏକ ଘାଇ ହେବା ଦ୍ବାରା ଗାଁକୁ ପ୍ରାୟ ଚାରି ଫୁଟର ପାଣି ମାଡି ଆସିଛି ।
ଫଳରେ ସମ୍ପର୍ଣ ଗାଁ ଜଳମଗ୍ନ ହେବାସହ ଶହଶହ ଚାଷ ଜମିରେ ପାଣି ମାଡିଯାଇଛି । କେନାଲରେ ଘାଇ ହେବାର ଖବର ପାଇ ଇନ୍ଦ୍ରବତୀ କେନାଲ କର୍ତ୍ତୃପକ୍ଷ ଓ ଯନ୍ତ୍ରୀ ଘଟଣା ସ୍ଥଳରେ ପହଞ୍ଚି ଯାଞ୍ଚ କରୁଛନ୍ତି । ଏହାସହ ସ୍ଥାନୀୟ ଲୋକଙ୍କୁ ନେଇ କେନାଲକୁ ମରାମତି କରିବା ସହ ପାଣି ଅଟକାଇବାକୁ ଚେଷ୍ଟା କରୁଛନ୍ତି ।
ବର୍ତ୍ତମାନ ସୁଦ୍ଧା ଗାଁରେ ପାଣି ଲହଡି ଭାଙ୍ଗୁଥିବା ବେଳେ ଏହାକୁ ନେଇ ଗ୍ରାମବାସୀଙ୍କ ସମେତ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖାଦେଇଛି । ପଣ୍ଡି ଗାଁରେ କମଲପୁର ବ୍ଲକ ପ୍ରଶାସନ ସହ ଇନ୍ଦ୍ରାବତୀ ଏସଡିଓ ପହଞ୍ଚି ଗାଁ ଲୋକଙ୍କ ସହ ଆଲୋଚନା କରୁଛନ୍ତି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
