ଶ୍ରୀନଗର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ହିଟଲରଙ୍କ ସହ ତୁଳନା କରିଛନ୍ତି ନ୍ୟାସନାଲ କନଫରେନ୍ସର ଅଧ୍ଯକ୍ଷ ତଥା ଜମ୍ମୁ-କାଶ୍ମୀର ପୂର୍ବତନ ମୁଖ୍ୟମନ୍ତ୍ରୀ ଫାରୁକ୍ ଅବଦୁଲ୍ଲା । ସେ ହିଟଲରଙ୍କ ଶାସନ ସହ ମୋଦିଙ୍କ ଶାସନକୁ ତୁଳନା କରିଛନ୍ତି । ସେ କହିଛନ୍ତି, ହିଟଲର ଯାହା କହୁଥିଲେ ମୋଦି ମଧ୍ୟ ସେୟା କହୁଛନ୍ତି। ମୋଦି ଯେପରି ସବ୍କା ସାଥ୍ ସବ୍କା ବିକାଶ କହୁଛନ୍ତି ଜର୍ମାନୀରେ ହିଟଲର ମଧ୍ୟ ଏପରି କହୁଥିଲେ। ଶ୍ରୀନଗରର ଖାନୟାର ଅଞ୍ଚଳରେ ଆୟୋଜିତ ଏକ ନିର୍ବାଚନ ରାଲିକୁ ସମ୍ବୋଧିତ କରିବା ଅବସରରେ ଏପରି ମନ୍ତବ୍ୟ ଦେଇଥିଲେ ଫାରୁକ୍।
ଫାରୁକ୍ ଆହୁରି କହିଛନ୍ତି, ପୁଲୱାମା ଆକ୍ରମଣରେ 40ରୁ ଊର୍ଦ୍ଧ୍ବ ସିଆପରିଏଫ ଯବାନ ସହିଦ୍ ହୋଇଥିଲେ। କିନ୍ତୁ ପିଏମ ମୋଦି କେବଳ ବାଲାକୋଟ୍ ବାଲାକୋଟ୍ ଆକ୍ରମଣ ବିଷୟରେ କହୁଛନ୍ତି, ସିଏ କେବେ ଏହାର ଯାଞ୍ଚ ଉପରେ କଥା ଉଠାଇଛନ୍ତି କି?
ମୋଦି ହିଟଲରଙ୍କ ଭଳି କଥାବାର୍ତ୍ତା କରନ୍ତି ତାଙ୍କ ଭଳି ଦେଖା ଯାଆନ୍ତି ମଧ୍ୟ । ହିଟଲର ଯେପରି ଲୋକଙ୍କୁ ସତ୍ୟତା ଦେଖାଉ ନଥିଲେ ଏବେ ମଧ୍ୟ ସେୟା ହେଉଛି । ମୋଦି କେବଳ ଏୟାର ଷ୍ଟ୍ରାଇକ ନାଁରେ ମିଥ୍ୟା ଡେଙ୍ଗୁରା ପିଟିବା ସହ ଲୋକଙ୍କୁ ଭୂଆଁ ବୁଲାଉଛନ୍ତି ବୋଲି ଫାରୁକ୍ କହିଛନ୍ତି ।
ଫାରୁକ୍ କେବଳ ମୋଦି ସରକାରଙ୍କ ଉପରେ ବର୍ଷିଛନ୍ତି ତାହା ନୁହେଁ, ଏୟାର ଷ୍ଟ୍ରାଇକକୁ ମଧ୍ୟ ମିଥ୍ୟା ବୋଲି କହିଛନ୍ତି । ସେ ଆହୁରି ଧାରା 370 ଓ 35(A)କୁ ନେଇ ମଧ୍ୟ କହିଛନ୍ତି । ସେ କହିଛନ୍ତି କେନ୍ଦ୍ର ସରକାର ଏହାକୁ ହଟାଇବାକୁ ଚେଷ୍ଟା କରନ୍ତୁ ଆମେ ଲଢିବାକୁ ମଧ୍ୟ ପ୍ରସ୍ତୁତ ଅଛୁ ।
