ନୂଆଦିଲ୍ଲୀ: ବିହାରରେ ଦିନକୁ ଦିନ ବଢିବାରେ ଲାଗିଛି ଚମକି ଜ୍ବର ଆତଙ୍କ । ବର୍ତ୍ତମାନ ସୁଦ୍ଧା ଏହି ମାରାତ୍ମକ ରୋଗରେ 100ରୁ ଉର୍ଦ୍ଧ୍ବ ପିଲାଙ୍କ ମୃତ୍ୟୁ ଘଟିଛି । ଏତେ ସଂଖ୍ୟକ ଶିଶୁଙ୍କ ମୃତ୍ୟୁ ଘଟଣାକୁ ନେଇ ସାରା ଦେଶରେ ଭୟର ଆତଙ୍କ ଖେଳିଯାଇଛି । ଏହି ପ୍ରସଙ୍ଗକୁ ନେଇ ସୁପ୍ରିମକୋର୍ଟରେ ପୁଣି ଥରେ ଆଉ ଏକ ଜନସ୍ୱାର୍ଥ ମାମଲା ଦାଖଲ କରାଯାଇଛି । ଓକିଲ ଶିବ କୁମାର ତ୍ରିପାଠୀ ଏହି ଆବେଦନ କରିଛନ୍ତି।
ଉକ୍ତ ଯାଚିକାରେ ଏକ ଅଭିଜ୍ଞ ଡାକ୍ତରୀ ଟିମ ଗଠନ କରିବାକୁ ଆବେଦନ ହୋଇଛି । ଯେଉଁ ରିପୋର୍ଟରେ ଚମକି ଜ୍ବର ବ୍ୟାପିବାର କାରଣ ଖୋଜି ତିନି ମାସ ମଧ୍ୟରେ ଏହାର ରିପୋର୍ଟ ସୁପ୍ରିମକୋର୍ଟରେ ଦେବାକୁ ଆବେଦନ କରାଯାଇଛି । ଏଥିସହିତ କାହାର ବେପରୁଆ ମନୋଭାବ ଯୋଗୁଁ ଏତେ ସଂଖ୍ୟକ ପିଲାଙ୍କ ମୃତ୍ୟୁ ହୋଇଛି ତାହାର ତଦନ୍ତ କରିବାକୁ ମଧ୍ୟ ଦାବି ହୋଇଛି ।
ଚମକି ରୋଗରେ ପୀଡିତ ପିଲାଙ୍କୁ ତତ୍କାଳ ମେଡିକାଲ ସୁବିଧା ଯୋଗାଇ ଦେବାକୁ ସୁପ୍ରିମକୋର୍ଟ କେନ୍ଦ୍ର ଓ ବିହାର ସରକାରଙ୍କୁ ନିର୍ଦ୍ଦେଶ ଦେବାକୁ ଏହା ମାଧ୍ୟମରେ ଆବେଦନ କରାଯାଇଛି । ଖାଲି ସେତିକି ନୁହେଁ ଉକ୍ତ ରୋଗରେ ପୀଡିତ ଶିଶୁଙ୍କୁ ମାଗଣା ଚିକିତ୍ସା ସହ ତୁରନ୍ତ ଅଭିଜ୍ଞ ଡାକ୍ତରୀ ଟିମ ଏବଂ ମେଡିସିନ ଯୋଗାଇ ଦିଆଯିବାକୁ କୁହାଯାଉଛି ।
ସୂଚନାଯୋଗ୍ୟ, ବିହାରରେ ଆକ୍ୟୁଟ ଏନ୍ସେଫାଲାଇଟିସ ସିଣ୍ଡ୍ରୋମ(ଏଇଏସ୍)ରେ ବର୍ତ୍ତମାନ ସୁଦ୍ଧା 168 ଜଣ ପିଲାଙ୍କ ମୃତ୍ୟୁ ହୋଇଛି । ଏଭଳି ଏକ ମାରାତ୍ମକ ରୋଗ ଉପରେ ରୋକ ଲଗାଇବାକୁ ବିହାର ସରକାରକୁ କଡା ପଦକ୍ଷେପ ଗ୍ରହଣ କରିବାକୁ ବୁଧବାର ପାଟନା ଉଚ୍ଚତମ ନ୍ୟାୟଳୟରେ ଏକ ଜନସ୍ୱାର୍ଥ ମାମଲା ଦାଏର କରାଯାଇଥିଲା ।
