ଖୋର୍ଦ୍ଧା: ମେଡ଼ିକାଲରେ ଚାଲିଛି ବେଧଡ଼କ ନିଶା କାରବାର । କୋରୋନା ମୁକାବିଲା ପାଇଁ ବର୍ତ୍ତମାନ ସାରାଦେଶ ଲକଡାଉନ ସ୍ଥିତିରେ । ଏହି ପ୍ରାଣଘାତୀ ଭୂତାଣୁ କବଳରୁ କିପରି ନିସ୍ତାର ମିଳିବ ସେଥିପାଇଁ ସମସ୍ତେ ଚିନ୍ତିତ ଥିବାବେଳେ କେତେଜଣ ମୁନାଫାଖୋର ବ୍ୟକ୍ତି ଏହି ସମୟରେ ବେଆଇନ ନିଶା କାରବାର ଜାରି ରଖିଛନ୍ତି। । ଆଉ ଏହି ନିଶା କାରବାର ପାଇଁ ମେଡିକାଲକୁ ନିଜ ସୁରକ୍ଷିତ ସ୍ଥାନ ଭାବେ ବାଛି ନେଇଛନ୍ତି ଏହି ନିଶା ବ୍ୟବସାୟୀମାନେ ।
ଖୋର୍ଦ୍ଧା ମୁଖ୍ୟ ଚିକିତ୍ସାଳୟରେ ନିଶା କାରବାର ହେଉଥିବା ବିଶ୍ୱସ୍ତ ସୂତ୍ରରୁ ଖବର ପାଇ ସେଠାରେ ଚଢ଼ାଉ କରିଛି ଖୋର୍ଦ୍ଧା ଆଦର୍ଶ ଥାନା ପୋଲିସ । 15ଗ୍ରାମ ବ୍ରାଉନସୁଗାର ଜବତ କରିବା ସହ ଏହି କାରବାରରେ ଲିପ୍ତ ଥିବା ଜଣେ ମହିଳାଙ୍କ ସହ ଅନ୍ୟ ଜଣେ ଯୁବକ ଓ ସେମାନେ ବ୍ୟବହାର କରୁଥିବା ଏକ କାରକୁ ମଧ୍ୟ ଜବତ କରିଛି ପୋଲିସ । ଗିରଫ ମହିଳା ଜଣକ ଜଟଣୀ ଥାନା ଅଞ୍ଚଳର ବେବି ହସିନା ଏବଂ ଯୁବକ ଜଣକ ବିକି ରାଓ । ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ପ୍ରାୟ ଦେଢ଼ ଲକ୍ଷ ଟଙ୍କା ହେବ ବୋଲି ସୂଚନା ମିଳିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା , ଇଟିଭି ଭାରତ
