ରାଉରକେଲା: ରାଜ୍ୟର ଏକ ପ୍ରମୁଖ ସହର ହେଉଛି ରାଉରକେଲା । ଏହି ସହରରେ ଥିବା ଏକ ପ୍ରମୁଖ ଚିକିତ୍ସାଳୟ ହେଉଛି ଆରଜିଏଚ । ଏହି ଗୁରୁତ୍ବପୂର୍ଣ୍ଣ ହସ୍ପିଟାଲରେ ଗତ କିଛିଦିନ ଧରି ଗଛିତ ରକ୍ତର ଅଭାବ ଲାଗି ରହିଥିଲା । ଏକ ଗୁରୁତ୍ବପୂର୍ଣ୍ଣ ହସ୍ପିଟାଲରେ ରକ୍ତ ଅଭାବ ନେଇ ଇଟିଭି ଭାରତରେ ଗତ କିଛିଦିନ ଧରି ରିପୋର୍ଟ ପ୍ରକାଶ ପାଇଥିଲା ।
ବାରମ୍ବାର ଖବର ପ୍ରସାରଣ ହେବା ପରେ ଆଜି ସ୍ଥାନୀୟ ବିଜୁ ଯୁବ ବାହିନୀ ଏକ ରକ୍ତଦାନ ଶିବିର ଆୟୋଜନ କରିଥିଲେ । ବିଜୁ ଯୁବବାହିନୀର ଅନେକ ସଦସ୍ୟ ଏହି ରକ୍ତଦାନ ଶିବିରକୁ ଆସି ରକ୍ତଦାନ କରିଥିଲେ ଯାହାକି କିଛିଦିନ ପାଇଁ ରକ୍ତ ସମସ୍ୟା ଦୂର ହୋଇଛି ।
ତେବେ ଆରଜିଏଚ ଭଳି ଏକ ପ୍ରମୁଖ ସ୍ବାସ୍ଥ୍ୟକେନ୍ଦ୍ରରେ ରକ୍ତ ଅଭାବ ଲାଗିରହିବା ଚିନ୍ତାଜନକ । କାହିଁକି ନା ଏହି ହସ୍ପିଟାଲ ଉପରେ ଜିଲ୍ଲାର 70 ପ୍ରତିଶତ ଲୋକ ନିର୍ଭର କରୁଥିବା ବେଳେ ପଡୋଶୀ ଝାଡଖଣ୍ଡ ଓ ଛତିଶଗଡରୁ ମଧ୍ୟ ରୋଗୀ ଆସିଥାନ୍ତି ।
ଯଦି ଆଗାମୀ ଦିନରେ ସହରରେ ଥିବା ବୁଦ୍ଧିଜୀବୀ, ସ୍ବେଛାସେବୀ ସଂଗଠନ, ବିଭିନ୍ନ ଅନୁଷ୍ଠାନ ସ୍ବଇଛାରେ ରକ୍ତଦାନ ପାଇଁ ଆଗେଇ ନଆସନ୍ତି ତେବେ ଆଗକୁ ପରିସ୍ଥିତି ଭୟାବହ ହେବ ଏଥିରେ ସନ୍ଦେହ ନାହିଁ ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
