ଭଦ୍ରକ: ସହରରେ ବସବାସ କରୁଥିବା ଲୋକଙ୍କ ବ୍ୟସ୍ତବହୁଳ ଜୀବନକୁ ଟିକେ ସରସ ସୁନ୍ଦର କରିବା ପାଇଁ ସରକାରଙ୍କ ଅମୃତ ଯୋଜନା ମାଧ୍ୟମରେ ଭଦ୍ରକ ଜିଲ୍ଲାରେ ପ୍ରଥମ ଥର ପାଇଁ ଏକ ନୌକା ବିହାର ବା ବୋଟିଂ ପ୍ଲେସ କରାଯାଇଥିଲା । ଏହାସହ ସବୁବର୍ଗର ଲୋକଙ୍କ ପାଇଁ ଏକ ପାର୍କ ମଧ୍ୟ ନିର୍ମାଣ କରାଯାଇଥିଲା । ହେଲେ ଜିଲ୍ଲାର ଏହି ଦୁଇ ପ୍ରକଳ୍ପ ଜନ୍ମ ହେବାର କିଛିଦିନ ପରେ ଯେମିତି ମୃତ୍ୟୁ ସହ ସଂଗ୍ରାମ କରୁଛି ।
କଥାରେ ଅଛି ‘ସରକାର କା ମାଲ ଦରିଆ ମେ ଡାଲ’ ଆଉ ଏହି ଉକ୍ତିକୁ ଅକ୍ଷୟରେ ଅକ୍ଷୟରେ ପାଳନ କରୁଛନ୍ତି ଭଦ୍ରକ ପୌର ପରିଷଦ । ଭଦ୍ରକବାସୀଙ୍କ ଅବସର ବିନୋଦନ ପାଇଁ ପାଇଁ ଗତବର୍ଷ ଭଦ୍ରକ ପୌରାଞ୍ଚଳର ଦୁଇ ନମ୍ବର ୱାର୍ଡ ଅନ୍ତର୍ଗତ ରହଣିଆ ଠାରେ ନିର୍ମିତ ହୋଇଥିଲା ପ୍ରାୟ ଦେଢ କୋଟି ଟଙ୍କାରେ ଏକ ନୌକା ବିହାର ଓ ପାର୍କ । ତେବେ ଏହାର ଭବିଷ୍ୟତ ଏବେ ଆପଣଙ୍କ ସାମନାରେ । ଆରମ୍ଭରୁ ମାତ୍ର କିଛିଦିନ ଚାଲିବା ପରେ ନୌକା ବିହାର ଏବେ "ଦଳ"ର ଗନ୍ତାଘର ପାଲଟିଛି । ନା ଚାଲୁଛି ନୌକା ନା ଆସୁଛନ୍ତି ପର୍ଯ୍ୟଟକ ।
ଖାଲି ସେତିକି ନୁହେଁ ନୌକା ବିହାର ପାଖରେ ନିର୍ମିତ ହୋଇଥିବା ପାର୍କ ମଧ୍ୟ ଜରାଜୀର୍ଣ୍ଣ ଅବସ୍ଥାରେ ପଡିଛି । ପାର୍କର ଚତୁଃପାର୍ଶ୍ବ ବିପର୍ଯ୍ୟସ୍ଥ ହୋଇପଡିଥିବା ବେଳେ ପାର୍କ ଭିତରେ ଲାଗିଥିବା ସାମଗ୍ରୀ ସବୁ ଅକାମୀ ହୋଇ ପଡିଛି । ପାଣି, ବିଜୁଳି କିଛି ବି ନଥିବା ବେଳେ ପାର୍କଟି ତାର ମହତ ଉଦ୍ଦେଶ୍ୟରୁ ଦୂରେଇ ଯାଇଛି । ତେବେ ଦେଢକୋଟି ଟଙ୍କା ବ୍ୟୟରେ ନିର୍ମିତ ଏହି ଦୁଇ ପ୍ରକଳ୍ପକୁ ତୁରନ୍ତ ପୁନଃରୁଦ୍ଧାର କରିବାକୁ ଦାବି କରିଛନ୍ତି ଭଦ୍ରକ ବାସୀ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
