ବାଲେଶ୍ବର: ଡମ୍ଫର ଧକ୍କାରେ ଜଣେ ସାଇକେଲ ଆରୋହୀଙ୍କ ମୃତ୍ୟୁକୁ ନେଇ ଏବେ ଜଳୁଛି ସାରା ଗାଁ । ଏହା ଏକ ଦୁର୍ଘଟଣା ନୁହେଁ ବରଂ ହତ୍ୟାକାଣ୍ଡ ବୋଲି ସନ୍ଦେହ କରି 7ରୁ ଊର୍ଦ୍ଧ୍ୱ ଗାଡି ଓ ଗୋଟିଏ ଘର ଗ୍ରାମବାସୀ ପୋଡ଼ି ଦେଇଥିବା ଜଣାପଡିଛି । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ଭୋଗରାଇ ଅଞ୍ଚଳରେ ।
ସୂଚନାନୁସାରେ, ଭୋଗରାଇ ଥାନା ଅଧୀନ ଦାହୁଣଦା-ରାଣୀଗୁଡା ମୁଖ୍ୟରାସ୍ତାର ମଶାଣିଛକ ଠାରେ ଆଜି ସନ୍ଧ୍ୟାରେ ଏକ ଡମ୍ଫର ଧକ୍କାରେ ଜଣେ ସାଇକେଲ ଆରୋହୀଙ୍କ ମୃତ୍ୟୁ ହୋଇଥିଲା । ମୃତକ ଦାହୁଣଦା ଗ୍ରାମର 65 ବର୍ଷୀୟ ଅବସରପ୍ରାପ୍ତ ସ୍କୁଲ ପିଅନ ଶଶିକାନ୍ତ ଦାସ । ଦୁର୍ଘଟଣା ଘଟାଇ ଡମ୍ଫର ଚାଳକ ଫେରାର ହୋଇଥିବା ବେଳେ ଘଟଣାସ୍ଥଳରେ ପ୍ରବଳ ଉତ୍ତେଜନା ଲାଗି ରହିଛି । ଡମ୍ଫର ମାଲିକ ଘନଶ୍ୟାମ ଦାସ ମୃତ ଶଶିକାନ୍ତଙ୍କ ଦାଦା ପୁଅ ଭାଇ ବୋଲି ସୂଚନା ରହିଛି । ତେବେ ଏହା ଦୁର୍ଘଟଣା ନୁହେଁ ବରଂ ହତ୍ୟାକାଣ୍ଡ ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
ଫଳରେ ଉତ୍ତ୍ୟକ୍ତ ସ୍ଥାନୀୟ ଲୋକେ ଡମ୍ଫର ମାଲିକ ଘନଶ୍ୟାମଙ୍କ 4 ଟି ଡମ୍ଫର, 2ଟି ଟ୍ରାକ୍ଟର, ଗୋଟିଏ ଜେସିବି ଏବଂ ଗୋଟିଏ ଇଣ୍ଡିଗୋ କାର ସହ ଘର ଓ ଅନ୍ୟ ଗାଡିକୁ ପୋଡି ଦେଇଥିବା ଦେଖିବାକୁ ମିଳିଛି । ସେପଟେ ଘଟଣାର ଖବର ପାଇ କର୍ମଦା ପୋଲିସ ଓ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚିଛି ।
ପୋଲିସ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହିତ ଘଟଣାର ତଦନ୍ତ ଆରମ୍ଭ କରିଛି । ତେବେ ଦୁଇ ଗ୍ରାମରେ ଦୁଇ ପ୍ଲାଟୁନ ପୋଲିସ ମୁତୟନ ହୋଇଥିବାବେଳେ ଜଳେଶ୍ବର-ରଣକୁଠା ରାସ୍ତାକୁ ଅବରୋଧ କରାଯାଇଛି । ଏବେ ବି ଗ୍ରାମରେ ଉତ୍ତେଜନା ଲାଗି ରହିଛି । ଜମିବାଡି ବିବାଦକୁ ନେଇ ଏଭଳି ଘଟଣା ଘଟିଥିବା ସନ୍ଦେହ କରାଯାଉଥିବା ବେଳେ ବର୍ତ୍ତମାନ ସୁଦ୍ଧା ଘଟଣାକୁ ନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
