ମୁମ୍ବାଇ: ପଡୋଶୀ ମହିଳା ବାନ୍ଧବୀଙ୍କୁ ଗଣ ଦୁଷ୍କର୍ମ । ପାର୍ଟି କରିବା ପରେ ମହିଳାଙ୍କ ସହ ଦୁଷ୍କର୍ମ କଲେ ତିନି ଯୁବକ । ମହାରାଷ୍ଟ୍ର ପୁନେର କନ୍ଧୱା ଥାନା ଅଞ୍ଚଳରେ ଏଭଳି ଏକ ଜଘନ୍ୟ ଘଟଣା ଘଟିଛି । ମହିଳାଙ୍କ ମୁହଁରେ ଏକ ବେହୋସ ହେବା ଔଷଧ ସ୍ପ୍ରେ କରି ଏହି କାଣ୍ଡ ଘଟାଇଛନ୍ତି ତିନି ଯୁବକ । ଏହି ଘଟଣାରେ ପୋଲିସ ଏକ ମାମଲା ରୁଜୁ କରି ତିନି ଅଭିଯୁକ୍ତଙ୍କୁ ଗିରଫ କରିଛି ।
ଅକ୍ଟୋବର ୯ ତାରିଖରେ କନ୍ଧୱା ଥାନା ଅଞ୍ଚଳରେ ଦିନ ୯ଟାରୁ ୧୧ଟା ମଧ୍ୟରେ ଏହି ଘଟଣା ଘଟିଛି । ପୀଡ଼ିତା ମହିଳା ଅନ୍ୟ ତିନି ବନ୍ଧୁଙ୍କ ସହ ଗୋଟିଏ ଫ୍ଲାଟ୍ରେ ରହୁଛନ୍ତି । ଅକ୍ଟୋବର ୯ ତାରିଖରେ ୪ ବନ୍ଧୁ ମିଶି ପାର୍ଟି କରିଥିଲେ । ଏହାପରେ ମହିଳା ଜଣକ ନିଜ ରୁମ୍ କବାଟ ବନ୍ଦ ନକରି ଶୋଇ ପଡ଼ିଥିଲେ । ଏହି ସମୟରେ ତିନି ଫ୍ଲାଟ୍ମେଟ୍ ମଧ୍ୟରୁ ଜଣେ ତାଙ୍କ ମୁହଁରେ ବେହୋସ ହେବା ଔଷଧ ସ୍ପ୍ରେ କରିଥିଲେ । ଏହାପରେ ୩ ଫ୍ଲାଟମେଟ ମିଶି ୩୭ ବର୍ଷୀୟ ମହିଳାଙ୍କ ସହ ଗଣଦୁଷ୍କର୍ମ କରିଥିଲେ ।
ମୁହଁରେ ବେହୋସ ହେବା ଔଷଧ ସ୍ପ୍ରେ ହୋଇଥିବାରୁ ମହିଳାଙ୍କ ପ୍ରାୟ ଦେଢ଼ ଦିନ ପରେ ହୋସ୍କୁ ଆସିଥିବା କଥା କହିଛନ୍ତି । ଏହାପରେ ତାଙ୍କ ସହ ଘଟିଥିବା ଦୁଷ୍କର୍ମ ବିଷୟରେ ସେ ଜାଣିବାକୁ ପାଇଥିଲେ । ସେପଟେ ଏଭଳି ଅଭିଯୋଗ ପରେ ତିନି ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ଗିରଫ ଅଭିଯୁକ୍ତ ବିମାନନଗର ରାକେଶ ସତୀଶ ଅଧବ, ମହମ୍ମଦ ଶାହାନାଜୁଦ୍ଦିନ, ମହମ୍ମଦ ସର୍ବାଉଦ୍ଦିନ ବୋଲି ଜଣା ପଡ଼ିଛି । ୩ ଅଭିଯୁକ୍ତଙ୍କ ବିରୋଧରେ ଗଣଦୁଷ୍କର୍ମ ମାମଲା ରୁଜୁ କରିଛି ପୋଲିସ ।
