ଉତ୍ତରକାଶୀ (ଉତ୍ତରାଖଣ୍ଡ) : ଉତ୍ତରକାଶୀ ଟନେଲ ଟ୍ରାଜେଡିରେ ଫସି ରହିଥିବା 41 ଜଣ ଶ୍ରମିକଙ୍କୁ ଉଦ୍ଧାର କାର୍ଯ୍ୟ 16 ଦିନରେ ପହଞ୍ଚିଛି । ପାଇପ ଭିତରେ ଫସି ରହିଥିବା ଅଗର ମେସିନକୁ ବାହାର କରାଯାଇଛି । ଅଗର ମେସିନ ଅପସାରଣ ପରେ ଆଗେଇ ଚାଲିଛି ଭୂଲମ୍ବ ଖନନ(vertical drilling) । ଟନେଲରୁ ଶ୍ରମିକମାନଙ୍କୁ ସୁରକ୍ଷିତ ଉଦ୍ଧାର ପାଇଁ ଯୁଦ୍ଧକାଳୀନ ଭିତ୍ତିରେ ଚାଲିଛି ଉଦ୍ଧାର କାର୍ଯ୍ୟ ।
ଏହା ମଧ୍ଯ ପଢ଼ନ୍ତୁ: ଉତ୍ତରକାଶୀ ଟନେଲ୍ ଟ୍ରାଜେଡି: କାମ କରୁନି ମେସିନ୍, ଏବେ ମାନୁଆଲ୍ ଡ୍ରିଲିଂ
ଉତ୍ତରକାଶୀ ଟନେଲରେ ୧୬ ଦିନ ଧରି ଜାରି ରହିଛି ଉଦ୍ଧାରକାର୍ଯ୍ୟ । ଉଦ୍ଧାରକାର୍ଯ୍ୟରେ ବିଭିନ୍ନ ଏଜେନ୍ସି ନିୟୋଜିତ ହୋଇଥିବା ବେଳେ, ବାଧା ସୃଷ୍ଟି କରିଥିଲା ଅଗର ମେସିନ । ଫସି ରହିଥିବା ଅଗର ମେସିନକୁ ପାଇପ ଭିତରୁ ବାହାର କରାଯିବା ପରେ, ଟନେଲର ଉପର ପଟରୁ(vertically) ଡ୍ରିଲିଂ କରାଯାଉଛି । ବର୍ତ୍ତମାନ ସୁଦ୍ଧା ଭୂଲମ୍ବ ଖନନ ୩୦ ମିଟର ହୋଇଛି । ଉଦ୍ଧାରକାରୀ ଟିମ୍ ର ସୂଚନା ଅନୁସାରେ, ଭୁଲମ୍ବ ଖନନ ୮୮ ମିଟର କରାଯିବ । ଏଥିପାଇଁ ଆଉ ୪ ଦିନ ସମୟ ଲାଗିପାରେ ବୋଲି ଉଦ୍ଧାରକାର୍ଯ୍ୟରେ ନିୟୋଜିତ ଭାରତୀୟ ସେନା ପକ୍ଷରୁ କୁହାଯାଇଛି ।
ଏହା ମଧ୍ଯ ପଢ଼ନ୍ତୁ: ଟନେଲରୁ ବାହାରିବେ ନବରଙ୍ଗପୁରର ଭଗବାନ ଭତ୍ରା, ଭେଟିବାକୁ ଗଲେ ଭାଇ
ଅଗର ମେସିନକୁ ବାହାର କରାଯାଇ ସାରିଥିବା ବେଳେ, ଏବେ ମାନୁଆଲ ଡ୍ରିଲିଂ ପାଇଁ ପ୍ରକ୍ରିୟା ଆରମ୍ଭ ହୋଇଛି । ମାନୁଆଲ ଡ୍ରିଲିଂର ମନିଟରିଂ କରୁଛି ଭାରତୀୟ ସେନାର ମାଡ୍ରାସ ସେସେପର୍ସ ଇଂଜିନିୟରିଂ ବାଟାଲିୟନ । ରେଟ୍ ମାଇନିଂ ନିୟମ ଅନୁସାରେ ମାନୁଆଲ ଡ୍ରିଲିଂ କରାଯିବ । ଏଥିରେ ଛୋଟ ଛୋଟ ସୁଡ଼ଙ୍ଗ ଖୋଳାଯିବ । ସାଧାରଣତଃ କୋଇଲା ଖଣିଗୁଡ଼ିକରେ ଏପରି ସୁଡ଼ଙ୍ଗ କରାଯାଇଥାଏ ।
ଏହା ମଧ୍ଯ ପଢ଼ନ୍ତୁ: ଉତ୍ତରକାଶୀ ଟନେଲ ଟ୍ରାଜେଡି, ଦୁର୍ଘଟଣା ସ୍ଥଳକୁ ଗଲେ ଶ୍ରମମନ୍ତ୍ରୀ ସାରଦା ନାୟକ
ଭୂଲମ୍ବ ଖନନ ଏବଂ ମାନୁଆଲ ଡ୍ରିଲିଂ ମାଧ୍ୟମରେ ଫସି ରହିଥିବା ୪୧ ଶ୍ରମିକଙ୍କ ନିକଟରେ ପହଞ୍ଚିବା ପାଇଁ ଉଦ୍ଧାରକାର୍ଯ୍ୟ ଜୋରସୋରରେ ଚାଲିଛି । ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ପୂର୍ବତନ ପରାମର୍ଶଦାତା ଭଆସ୍କର ଖୁଲ୍ବେଙ୍କ ଉପସଚିବ ସଚିନ ମଙ୍ଗେଶ ଘିଲ୍ଡିୱାଲ୍ ସିଲକ୍ୟାରରେ ପହଞ୍ଚି ଉଦ୍ଧାରକାର୍ଯ୍ୟର ଅନୁଧ୍ୟାନ କରିଛନ୍ତି ।
ଉତ୍ତରକାଶୀ ଟନେଲ ଟ୍ରାଜାଡିର ଉଦ୍ଧାରକାର୍ଯ୍ୟକୁ ନେଇ ପୂର୍ବାନୁମାନ କରିଛନ୍ତି ଅନ୍ତର୍ଜାତୀୟ ଟନେଲିଂ ବିଶେଷଜ୍ଞ ଆର୍ଣ୍ଣଲୋଡ୍ ଡିସ୍କ । ଆସନ୍ତା ଡିସେମ୍ବର ୨୫ ତାରିଖ (ଖ୍ରୀଷ୍ଟମାସ) ପୂର୍ବରୁ ଟନେଲରୁ ୪୧ ଶ୍ରମିକଙ୍କୁ ଉଦ୍ଧାରକାର୍ଯ୍ୟ ସଂପୂର୍ଣ୍ଣ ହୋଇଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି ।
ନଭେମ୍ବର ୧୨ ତାରିଖରୁ ଟନେଲରେ ଫସି ରହିଛନ୍ତି ୪୧ ଜଣ ଶ୍ରମିକ । ଏଥିରେ ଅଛନ୍ତି ଓଡ଼ିଶାରୁ ୫ ଜଣ ଶ୍ରମିକ । ଫସି ରହିଥିବା ଶ୍ରମିକମାନଙ୍କୁ ସେନା ସମେତ ବିଭିନ୍ନ ଉଦ୍ଧାରକାରୀ ଟିମ୍ ଯୁଦ୍ଧକାଳୀନ ଭିତ୍ତିରେ ଲାଗି ପଡ଼ିଥିବା ବେଳେ, ଶ୍ରମିକମାନେ କେବେ ଟନେଲ ବାହାରକୁ ଆସିବେ, ତାକୁ ହିଁ ସମସ୍ତେ ଅପେକ୍ଷା କରି ରହିଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
