ଡେରାଡୁନ: ବିବାହରେ ସାମିଲ ହେବାକୁ କାରରେ ଉତ୍ତରାଖଣ୍ଡରୁ ଉତ୍ତରପ୍ରଦେଶ ଯାଉଥିଲା ପୁରା ପରିବାର । ହସ ଖୁସିରେ ଅତିକ୍ରମ କରୁଥିଲେ ରାସ୍ତା । କିନ୍ତୁ ବାଟରେ ଛକି ବସିଥିଲା ମୃତ୍ୟୁ । ବିବାହରେ ପହଞ୍ଚିବା ପୂର୍ବରୁ ସଡକ ଦୁର୍ଘଟଣାରେ ଆଖି ବୁଜିଲେ ଗୋଟିଏ ପରିବାରର 6 ସଦସ୍ୟ । ୟୁପିର ଦେଓରିଆ ଜିଲ୍ଲାରେ ଏଭଳି ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଏକ ଅଜଣା ଗାଡିକୁ କାର ଧକ୍କା ଦେବା ପରେ 6 ଜଣଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଜଣେ ଦମ୍ପତି, ତାଙ୍କର ଦୁଇ ଝିଅ ଓ ତିନି ବର୍ଷର ପୁଅ ରହିଛନ୍ତି । ଏହି ଦୁର୍ଘଟଣା ପରେ ମୃତକଙ୍କ ଗ୍ରାମରେ ଶୋକର ଛାୟା ଖେଳିଯାଇଛି ।
ମିଳିଥିବା ସୂଚନା ଅନୁଯାୟୀ, ଶୁକ୍ରବାର ରାତିରେ ନୈନିତାଲ ଜିଲ୍ଲାର ବିନ୍ଦୁଖତା ଭିଆଇପି ଗେଟ ଦୁର୍ଗାପାଲ କଲୋନିରୁ ସୋନୁ ସାହା ତାଙ୍କ ପରିବାର ସହ ଉତ୍ତରପ୍ରଦେଶର ଘାଲିବପୁରକୁ ଏକ ବିବାହରେ ସାମିଲ ହେବାକୁ କାର ଯୋଗେ ବାହାରିଥିଲେ । କିନ୍ତୁ ଗନ୍ତବ୍ୟସ୍ଥଳରେ ପହଞ୍ଚିବା ପୂର୍ବରୁ ଦେଓରିଆଠାରେ ଏକ ଅଜଣା ଗାଡିକୁ ଧକ୍କା ଦେଇଥିଲା ସୋନୁଙ୍କ କାର୍ । ଫଳରେ ଘଟଣାସ୍ଥଳରେ 6ଜଣଙ୍କର ମୃତ୍ୟୁ ହୋଇଥିଲା । ରାତି 2ଟା 30 ମିନିଟ ସମୟରେ ଦୁର୍ଘଟଣା ଘଟିଥିଲା ।
ତେବେ ଡ୍ରାଇଭରର ଆଖି ଲାଗି ଯିବାରୁ ଏହି ଦୁର୍ଘଟଣା ଘଟିଥିବା କୁହାଯାଉଛି । ଦୁର୍ଘଟଣା ଏତେ ଭୟଙ୍କର ଥିଲା ଯେ କାରଟି ସମ୍ପୂର୍ଣ୍ଣ ଭାଙ୍ଗି ଯାଇଛି । ଏନେଇ ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇଛି । ସ୍ଥାନୀୟ ଲୋକଙ୍କ କହିବା ଅନୁଯାୟୀ ଏକ ଟ୍ରକ ସହ କାରଟି ଧକ୍କା ହେବା ପରେ ଭାରସାମ୍ୟ ହରାଇ ଡିଭାଇଡରରେ ପିଟି ହୋଇଥିଲା । ତେବେ କେଉଁ ଗାଡି ସହ କାର ଧକ୍କା ହୋଇଛି ସେନେଇ ତଦନ୍ତ ଜାରି ରଖିଛି ପୋଲିସ ।
ଗତ ମାର୍ଚ୍ଚ 4 ତାରିଖରେ ହରିୟାଣାରେ ପୃଥକ ପୃଥକ ସଡକ ଦୁର୍ଘଟଣାରେ 17 ଜଣଙ୍କ ମୃତ୍ୟୁ ହୋଇଛି । ଫରିଦାବାଦ ଏବଂ ପାନିପଥରେ ଦୁର୍ଘଟଣା ଘଟି 9 ଜଣଙ୍କର ମୃତ୍ୟୁ ହୋଇଥିଲା । ଏହାପରେ ଅମ୍ବାଲା ଜିଲ୍ଲାରେ ବସ୍ ଓ ଟ୍ରକ ମଧ୍ୟରେ ଦୁର୍ଘଟଣା ଯୋଗୁଁ ପୁଣି 8 ଜଣଙ୍କର ଜୀବନ ଯାଇଥିବା ଖବର ସାମ୍ନାକୁ ଆସିଥିଲା । ବସ୍ ସହ ଏକ ଦ୍ରୁତଗାମୀ ଟ୍ରକ ଧକ୍କା ହେବା ଯୋଗୁଁ 8 ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଥିଲେ । ସମସ୍ତ ମୃତକ ଉତ୍ତରପ୍ରଦେଶର ଶ୍ରମିକ ହୋଇଥିବା ପୋଲିସର ତଦନ୍ତ ପରେ ଜଣାପଡିଥିଲା।
