ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଅର୍ଥନୈତିକ ବ୍ୟାପାର ସମ୍ବନ୍ଧୀୟ କ୍ୟାବିନେଟ କମିଟି( Cabinet Committee on Economic Affairs) ଭାରତ ସରକାରଙ୍କର ୪୪୬.୮୩ କୋଟି ଟଙ୍କାର ବକେୟା ଋଣ ଅର୍ଥ ପରିଶୋଧ ପାଇଁ ତିନି ବର୍ଷର ଅବଧି (୨୦୨୦- ୨୧, ୨୦୨୧ -୨୨ ଏବଂ ୨୦୨୨-୨୩) ନିମନ୍ତେ ଏକ ଋଣ ପରିଶୋଧ ମହଲତକୁ ମଞ୍ଜୁରୀ ପ୍ରଦାନ କରିଛନ୍ତି । ଏହି ମହଲତ କୋଭିଡ ୧୯ ମହାମାରୀ କାରଣରୁ ସୃଷ୍ଟି ହୋଇଥିବା ସଙ୍କଟର ମୁକାବିଲା ପାଇଁ କୋଚିନ ବନ୍ଦର ପ୍ରାଧିକରଣ (Cochin Port Authority)କୁ ଦିଆଯାଇଛି ।
ବକେୟା ଋଣ ସମୁଦାୟ ଅର୍ଥ ରାଶି ୨୦୧୮ -୧୯ ରୁ ଆରମ୍ଭ ହୋଇ ୧୦ଟି କିସ୍ତିରେ ସୁଝିବାକୁ ଥିଲା । କିନ୍ତୁ କୋଚିନ ବନ୍ଦର ପ୍ରାଧିକରଣ କେବଳ ୨୦୧୮ -୧୯ ଏବଂ ୨୦୧୯ -୨୦ର କିସ୍ତି ଗୁଡିକୁ ପ୍ରଦାନ କରି ପାରିଥିଲେ । ୨୦୨୦ -୨୧ ଠାରୁ କୋଭିଡ ୧୯ ମହାମାରୀ କାରଣରୁ ପରିବହନ ଅତ୍ୟଧିକ ପରିମାଣରେ ପ୍ରଭାବିତ ହୋଇଥିଲା । ଯାହା ଫଳରେ ନଗଦ ଅର୍ଥ କାରବାର ଉପରେ ପ୍ରତିକୂଳ ପ୍ରଭାବ ପଡିଥିଲା । ଯଦ୍ବାରା କୋଚିନ ବନ୍ଦର ୨୦୨୦ -୨୧ ଏବଂ ୨୦୨୧ -୨୨ର କିସ୍ତି ଦେଇ ପାରି ନଥିଲେ । କୋଚିନ ବନ୍ଦରକୁ ନଭେମ୍ବର ୨୦୨୧ ଠାରୁ କାର୍ଯ୍ୟକାରୀ ହୋଇଥିବା ପ୍ରମୁଖ ବନ୍ଦର ପ୍ରାଧିକରଣ ଅଧିନିୟମ, ୨୦୨୧ ଅଧୀନକୁ ଅଣାଯାଇଛି ।
ବର୍ଷ ୧୯୩୬ - ୩୭ ରୁ ୧୯୯୪- ୯୫ ମଧ୍ୟରେ ବିଭିନ୍ନ ଭିତ୍ତିଭୂମିର ଉନ୍ନୟନମୂଳକ କାର୍ଯ୍ୟକଳାପ ନିମନ୍ତେ କୋଚିନ ବନ୍ଦର ଭାରତ ସରକାରଙ୍କ ଠାରୁ ଋଣ ନେଇଥିଲା । ତେବେ ଋଣ ଉପରେ ସୁଧକୁ ଛାଡ କରିବା ପାଇଁ ଦିଆଯାଇଥିବା ପ୍ରସ୍ତାବକୁ ଅର୍ଥନୈତିକ ବ୍ୟାପାର ସମ୍ବନ୍ଧୀୟ କ୍ୟାବିନେଟ କମିଟି ମଞ୍ଜୁରୀ ପ୍ରଦାନ କରିଛି ।
